2030 تک پاکستان کی 50 فیصد گاڑیاں الیکٹرک ہوں گی: بی وائے ڈی پاکستان

2030 تک پاکستان کی 50 فیصد گاڑیاں الیکٹرک ہوں گی: بی وائے ڈی پاکستان

پاکستان کی آٹو موبائل صنعت میں ایک بڑی تبدیلی کا آغاز ہو چکا ہے، چینی کمپنی ’بی وائے ڈی‘ اور پاکستانی کار ساز ادارہ میگا موٹرز کی شراکت داری کے نتیجے میں بننے والی ’بی وائے ڈی پاکستان‘ نے اعلان کیا ہے کہ 2030 تک پاکستان میں فروخت ہونے والی گاڑیوں کا 50 فیصد حصہ الیکٹرک گاڑیوں پر مشتمل ہوگا۔

اس کا مقصد عالمی سطح پر ماحولیاتی اہداف کو پورا کرنے اور ملک میں جدید ترین ٹیکنالوجی کو فروغ دینا ہے۔چینی کمپنی ’بی وائے ڈی‘ جسے وارن بفٹ کی حمایت حاصل ہے، دنیا بھر میں الیکٹرک گاڑیوں کی صنعت میں ایک اہم مقام رکھتی ہے۔ گزشتہ ماہ اس نے پاکستان میں اپنے آپریشنز کا باقاعدہ آغاز کیا، جس سے جنوبی ایشیا میں 25 کروڑ کی آبادی والا یہ ملک کمپنی کی نئی مارکیٹوں میں شامل ہو گیا۔

کمپنی کی جانب سے اعلان کیا گیا ہے کہ 2026 تک پاکستان میں ایک اسمبلی پلانٹ بھی کھولا جائے گا، جس سے ملکی سطح پر الیکٹرک گاڑیوں کی پیداوار میں اضافہ ہوگا۔ تاہم، بی وائے ڈی نے رواں سال ہی پاکستان میں اپنی گاڑیاں فروخت کے لیے پیش کرنے کا ارادہ ظاہر کیا ہے اور اگست میں تین نئے ماڈلز بھی لانچ کیے ہیں۔بی وائے ڈی پاکستان کے ترجمان، کامران کمال نے رائٹرز کو دیے گئے انٹرویو میں بتایا کہ وہ پاکستان میں الیکٹرک گاڑیوں کی فروخت میں 2030 تک 50 فیصد تک اضافہ دیکھ رہے ہیں۔ ان کا کہنا تھا کہ "نیو انرجی وہیکل (این ای وی) میں تیزی سے منتقلی ہو رہی ہے اور پاکستان بھی اس رجحان کا حصہ بن رہا ہے۔

پاکستان میں الیکٹرک گاڑیوں کی بڑھتی ہوئی مقبولیت اس بات کا ثبوت ہے کہ ملک جدید ٹیکنالوجی کو اپنانے اور ماحولیاتی تحفظ کی طرف پیش رفت کر رہا ہے۔ پاکستانی مارکیٹ میں الیکٹرک گاڑیوں کی بڑھتی ہوئی طلب، توانائی کے بڑھتے ہوئے مسائل اور ایندھن کی قیمتوں میں مسلسل اضافہ کی وجہ سے، کار ساز کمپنیاں مستقبل کی طرف دیکھ رہی ہیں۔اس شراکت داری کا مقصد پاکستان میں الیکٹرک گاڑیوں کی صنعت کو ترقی دینا اور جدید ٹیکنالوجی کے ساتھ ماحول دوست گاڑیاں فراہم کرنا ہے۔ بی وائے ڈی کے نمائندے نے کہا کہ کمپنی نے پاکستانی مارکیٹ کی ضروریات کو مدنظر رکھتے ہوئے تین ماڈلز متعارف کروائے ہیں، جو اعلیٰ معیار اور جدید ترین فیچرز سے لیس ہیں۔

بی وائے ڈی پاکستان کا اسمبلی پلانٹ کھولنے کا اعلان ملکی معیشت کے لیے ایک مثبت قدم ہے۔ اس منصوبے سے نہ صرف پاکستان میں ملازمتوں کے مواقع پیدا ہوں گے بلکہ ملکی سطح پر گاڑیوں کی پیداوار میں بھی اضافہ ہوگا۔

اس کے علاوہ، یہ پلانٹ پاکستانی صارفین کو جدید ترین الیکٹرک گاڑیاں فراہم کرے گا جو عالمی معیار کے مطابق ہوں گی۔بی وائے ڈی اور میگا موٹرز کی شراکت داری سے پاکستان کی آٹو موبائل صنعت میں جدیدیت اور ترقی کا نیا دور شروع ہونے کی امید کی جا رہی ہے۔ اس اقدام سے پاکستان کی الیکٹرک گاڑیوں کی مارکیٹ کو فروغ ملے گا اور ملک کو ماحولیاتی تبدیلیوں کے اہداف پورا کرنے میں مدد ملے گی