وفاقی ملازمین کو 25 فیصد اضافہ، پینشنرز کو 15 فیصد اضافہ کی منظوری

وفاقی ملازمین کی تنخواہوں میں 25 فیصد اضافہ، ریٹائرڈ ملازمین کی پینشن میں 15 فیصد اضافے کا اعلان

اسلام آباد: وفاقی حکومت نے سرکاری ملازمین کی تنخواہوں اور ریٹائرڈ ملازمین کی پینشن میں اضافہ کر دیا ہے۔ وفاقی وزارت خزانہ کی جانب سے جاری کردہ نوٹیفکیشن کے مطابق، سرکاری ملازمین کی تنخواہوں میں 25 فیصد جبکہ وفاقی پنشنرز کی پینشن میں 15 فیصد اضافہ کیا گیا ہے۔ یہ اضافہ یکم جولائی 2024 سے نافذ العمل ہوگا۔

نوٹیفکیشن میں مزید بتایا گیا ہے کہ گریڈ ایک سے 16 تک کے ملازمین کی تنخواہوں میں 25 فیصد اضافہ کیا گیا ہے، جبکہ گریڈ 17 سے 22 تک کے سرکاری ملازمین کی تنخواہوں میں بیس فیصد اضافہ کر دیا گیا ہے۔

واضح رہے کہ وفاقی وزیر خزانہ محمد اورنگزیب نے 12 جون کو مالی سال 25-2024 کا 18 ہزار ارب روپے سے زائد حجم کا بجٹ پیش کیا تھا، جس میں سرکاری ملازمین کی تنخواہوں میں 25 فیصد اضافے کی تجویز دی گئی تھی۔ اسی بجٹ میں ملک میں ملازمین کی کم از کم تنخواہ 36 ہزار روپے مقرر کرنے کی بھی تجویز دی گئی تھی۔

رواں ماہ کے آغاز میں صدر مملکت آصف علی زرداری نے فنانس بل 25-2024 پر دستخط کیے تھے، جس کے بعد یکم جولائی سے بجٹ نافذ العمل ہو گیا تھا۔ قومی اسمبلی نے 28 جون کو اسپیکر ایاز صادق کی زیر صدارت ہونے والے اجلاس میں 18 ہزار 877 ارب روپے کا وفاقی بجٹ منظور کیا تھا، جو بھاری ٹیکسوں پر مشتمل ہے