عمران خان اور اسٹیبلشمنٹ میں اختلافات اپوزیشن کو پھانسی کے مطالبے پر ہوا رانا ثنااللہ کا انکشاف

عمران خان اور اسٹیبلشمنٹ میں اختلافات اپوزیشن کو پھانسی کے مطالبے پر ہوا رانا ثنااللہ کا انکشاف

پیرس: وزیراعظم کے مشیر برائے سیاسی امور، رانا ثنااللہ، نے انکشاف کیا ہے کہ اپوزیشن کو پھانسی لگانے کے مطالبے پر بانی پی ٹی آئی اور اسٹیبلشمنٹ کے درمیان لڑائی ہوگئی تھی۔
رانا ثنااللہ نے پیرس میں پاکستانیوں کے جلسے سے خطاب کرتے ہوئے کہا کہ بانی پی ٹی آئی کی سوچ جمہوری نہیں بلکہ آمرانہ اور فسادی ہے۔ ان کا کہنا تھا کہ بانی پی ٹی آئی اسٹیبلشمنٹ کے راج دلارے تھے، لیکن جب انہوں نے اپوزیشن کو پھانسی لگانے کا مطالبہ کیا تو اسٹیبلشمنٹ نے مخالفت کی، کیونکہ وہ اس حد تک نہیں جانا چاہتے تھے۔

رانا ثنا اللہ نے مزید بتایا کہ جب پی ٹی آئی حکومت میں آئی تو شہباز شریف اور بلاول بھٹو زرداری نے ساتھ چلنے کی پیشکش کی، جس پر عمران خان نے کہا کہ وہ سب کو جیل میں ڈال دیں گے۔ انہوں نے کہا کہ عمران خان کے خلاف تحریک عدم اعتماد آئینی تھی، لیکن بانی پی ٹی آئی مقابلے کی بجائے استعفے دے کر دوڑ گئے۔

اس موقع پر رانا ثنااللہ نے بیرون ملک پاکستانیوں سے اپیل کی کہ وہ ڈیجیٹل دہشتگردی سے نمٹنے میں پاکستان کی مدد کریں۔