سیکیورٹی فورسز کی خیبر میں بڑی کارروائی، 12 خوارج ہلاک

سیکیورٹی فورسز کی خیبر میں بڑی کارروائی، 12 خوارج ہلاک

سیکیورٹی فورسز نے خیبر پختونخوا کے ضلع خیبر کے علاقے وادی تیراہ میں اک خفیہ اطلاعات کی بنیاد پر ایک کامیاب آپریشن کرتے ہوئے بارہ خوارجوں کو ہلاک کر دیا۔ پاک فوج کے شعبہ تعلقات عامہ (آئی ایس پی آر) کے مطابق، اس کارروائی کا مقصد دہشت گرد عناصر کا صفایا کرنا اور علاقے میں امن کی بحالی تھا۔آپریشن کے دوران سیکیورٹی فورسز نے موثر حکمت عملی اپناتے ہوئے خوارج کے خلاف بھرپور کارروائی کی۔

اس کارروائی میں 12 دہشت گرد ہلاک ہوئے جبکہ سیکیورٹی فورسز نے علاقے کو کلیئر کر کے مزید سرچ آپریشنز بھی جاری رکھے۔ آئی ایس پی آر کے بیان میں کہا گیا ہے کہ 20 اگست سے اب تک سیکیورٹی فورسز کی مختلف کارروائیوں میں 37 دہشت گرد مارے گئے ہیں اور 14 زخمی ہو چکے ہیں۔آئی ایس پی آر کے ترجمان نے مزید کہا کہ ملک سے دہشت گردی کی لعنت کے خاتمے کے لیے فورسز کی کارروائیاں جاری رہیں گی۔

انہوں نے عوام اپیل کی کہ وہ امن کی بحالی کے لیے سیکیورٹی فورسز کے ساتھ تعاون کریں اور کسی بھی مشکوک سرگرمی کی اطلاع فوری طور پر متعلقہ حکام کو دیں۔ بیان میں مزید کہا گیا ہے کہ ملک کے دیگر حصوں بالخصوص بلوچستان میں بھی دہشت گرد عناصر کے خلاف کارروائیاں تیز کر دی گئی ہیں۔واضح رہے کہ دو روز قبل بھی سیکیورٹی فورسز نے وادی تیراہ میں ایک بڑے آپریشن کے دوران 25 دہشت گردوں کو ہلاک اور 11 کو زخمی کر دیا تھا۔

یہ آپریشنز ملک میں دہشت گردی کے بڑھتے ہوئے واقعات کے پیش نظر کیے جا رہے ہیں اور ان کا مقصد دہشت گردوں کے نیٹ ورک کو توڑنا اور ان کی کمین گاہوں کا صفایا کرنا ہے۔سیکیورٹی فورسز کے عزم کو دیکھتے ہوئے یہ کہا جا سکتا ہے کہ وہ ملک میں امن و امان کی بحالی کے لیے پرعزم ہیں اور دہشت گردی کے ناسور کو جڑ سے اکھاڑنے کے لیے ہر ممکن اقدامات کر رہی ہیں۔ وادی تیراہ سمیت ملک کے دیگر علاقوں میں جاری ان آپریشنز کا مقصد نہ صرف دہشت گردوں کا خاتمہ ہے بلکہ عوام کے تحفظ کو یقینی بنانا بھی ہے۔