قطر نے پاکستانیوں کے لیے ویزا فری انٹری کی سہولت متعارف کرا دی

دوحہ – قطر نے پاکستانی شہریوں کے لیے ویزہ فری انٹری کی پالیسی متعارف کرائی ہے، جس کے تحت پاکستانی اب بغیر ویزا کے قطر کا سفر کر سکتے ہیں۔ یہ اقدام قطر کی جانب سے سیاحتی شعبے کو فروغ دینے اور بین الاقوامی سیاحوں کو راغب کرنے کی کوششوں کا حصہ ہے۔ میڈیا رپورٹس کے مطابق، پاکستانی شہری زیادہ سے زیادہ 30 دن کے لیے قطر میں قیام کر سکتے ہیں، تاہم اس سہولت سے فائدہ اٹھانے کے لیے قیام مکمل ہونے کے بعد واپسی کے لیے تصدیق شدہ ٹکٹ درکار ہوگا۔ جتنے دن قطر میں قیام کرنا ہے، اتنے دن کی ہوٹل ریزرویشن پہلے سے کنفرم کروانی ہو گی، قطر میں داخلے کے لیے پولیو ویکسینیشن کا ثبوت پیش کرنا بھی ضروری قرار دیا گیا ہے اور درخواست گزار کے بینک اکاؤنٹ میں کم از کم 5,000 قطری ریال (تقریباً 4 لاکھ پاکستانی روپے) ہونا لازمی ہے۔

یہ پالیسی صرف سیاحتی مقاصد کے لیے دستیاب ہے۔ جو افراد نوکری کی تلاش یا ملازمت کے لیے قطر جانا چاہتے ہیں، ان پر یہ سہولت لاگو نہیں ہوگی۔ قطر میں سیاحت کے خواہشمند پاکستانی شہری اس موقع سے فائدہ اٹھا کر قطر کی ثقافت، تاریخی مقامات اور جدید فنِ تعمیر سے لطف اندوز ہو سکتے ہیں۔ مزید تفصیلات کے لیے قطر کی سرکاری ویب سائٹس یا قطری سفارت خانے سے رابطہ کیا جا سکتا ہے۔