پچھلے سال کے مقابلے موجودہ بجٹ میں ٹیکس کم کیے ہیں: وزیر خزانہ محمد اورنگزیب

اسلام آباد (ایم وائے کے نیوز) — وفاقی وزیر خزانہ محمد اورنگزیب نے دعویٰ کیا ہے کہ مالی سال 2025-26 کے بجٹ میں حکومت نے ممکنہ حد تک ریلیف فراہم کیا ہے اور پچھلے سال کی نسبت ٹیکسوں میں کمی کی گئی ہے۔

نجی ٹی وی کے ایک پروگرام میں گفتگو کرتے ہوئے وزیر خزانہ نے کہا کہ ملک میں اب میکرواکنامک استحکام آچکا ہے، اور حکومت نے سٹرکچرل ریفارمز کی بنیاد رکھ دی ہے، جو بقول ان کے "کہنا آسان اور کرنا مشکل” کام ہے۔ انہوں نے بتایا کہ اگرچہ نجکاری کے لیے اقدامات کیے گئے تھے، تاہم وہ تاحال کامیاب نہ ہو سکے۔

انہوں نے کہا کہ حکومت نے پانچ سالہ معاشی منصوبہ تیار کر لیا ہے اور وزیراعظم نے اس کے عملدرآمد کی نگرانی کے لیے انہیں کمیٹی کی سربراہی سونپی ہے۔ محمد اورنگزیب کے مطابق بیلنس آف پیمنٹ کے مسئلے کے وقت امپورٹس کم کی گئیں، تاہم اب مشینری کی درآمد میں اضافہ ہو رہا ہے جو معیشت کے لیے مثبت اشارہ ہے۔ انہوں نے تسلیم کیا کہ گندم اور کپاس کی پیداوار میں کمی آئی ہے مگر بجٹ کا مقصد درست معاشی سمت کی طرف قدم بڑھانا تھا۔

وزیر خزانہ نے بتایا کہ بجٹ میں ایڈیشنل ٹیکسز کا مجموعی حجم 200 سے 250 ارب روپے ہے، مگر ضم شدہ قبائلی اضلاع پر کوئی نیا ٹیکس نہیں لگایا گیا۔ ان کا کہنا تھا کہ سیلز ٹیکس کی مد میں 47 فیصد اضافہ ہوا ہے اور فیڈرل بورڈ آف ریونیو (FBR) کی کارکردگی بہتر بنانے کے لیے ٹرانسفارمیشن پروگرام جاری ہے۔ تنخواہ دار طبقے کے حوالے سے وزیر خزانہ نے کہا کہ ان کے لیے آسان فارم تیار کیا جا رہا ہے تاکہ ٹیکس فائلنگ کا عمل سہل ہو۔ انہوں نے دعویٰ کیا کہ نادرا کے پاس ہر فرد کا لائف اسٹائل ڈیٹا موجود ہے اور شناختی کارڈ سے واضح ہو جاتا ہے کہ کون کتنا ٹیکس دیتا ہے۔

محمد اورنگزیب نے گفتگو کے دوران بتایا کہ وہ اور وزیراعظم سرکاری تنخواہ نہیں لیتے، اور انہوں نے امید ظاہر کی کہ آئندہ برسوں میں پاکستان کی آئی ٹی ایکسپورٹس میں نمایاں اضافہ ہوگا۔ انہوں نے ملک کے معدنیات و کان کنی کے شعبے میں موجود وسیع امکانات کو بھی اجاگر کیا۔