محکمہ موسمیات نے پیشگوئی کی ہے کہ ملک بھر میں جاری گرمی کی شدید لہر مزید تین سے چار دن تک برقرار رہے گی۔ رپورٹ کے مطابق بالائی علاقوں میں درجہ حرارت معمول سے پانچ سے سات ڈگری سینٹی گریڈ زیادہ ریکارڈ کیا جا رہا ہے۔ جمعرات کے روز دادو اور تربت 48 ڈگری سینٹی گریڈ کے ساتھ ملک کے گرم ترین شہر رہے، جبکہ ڈیرہ غازی خان میں 47، بھکر، بہاولنگر، رحیم یار خان اور نوکنڈی میں 46 ڈگری سینٹی گریڈ درجہ حرارت ریکارڈ کیا گیا۔
محکمہ موسمیات نے واضح کیا ہے کہ ملک کے بیشتر حصوں میں 20 مئی تک ہیٹ ویو جاری رہنے کا امکان ہے۔ بلوچستان میں بھی گرمی کی شدت برقرار ہے اور پری مون سون بارشوں کے ختم ہونے کے بعد تمام علاقے خشک گرمی کی لپیٹ میں ہیں۔ آج ریکارڈ کیے گئے درجہ حرارت کے مطابق کوئٹہ میں 37، قلات میں 34، زیارت میں 28، ژوب میں 39، سبی میں 47، تربت میں 48، نوکنڈی میں 46، چمن میں 39، گوادر میں 41 اور جیوانی میں 37 ڈگری سینٹی گریڈ ریکارڈ کیا گیا ہے۔ محکمہ موسمیات نے پیشگوئی کی ہے کہ جنوبی اضلاع میں آئندہ ایک ہفتے کے دوران گرمی کی شدت برقرار رہے گی اور اس دوران تیز گرد آلود ہوائیں چلنے کا امکان بھی موجود ہے۔
خیبرپختونخوا میں بھی موسم خشک اور گرم رہے گا۔ صوبے کے میدانی اور جنوبی اضلاع شدید گرمی کی لپیٹ میں ہیں۔ پشاور میں کم سے کم درجہ حرارت 22 اور زیادہ سے زیادہ درجہ حرارت 43 ڈگری سینٹی گریڈ تک جانے کا امکان ہے۔ سب سے کم درجہ حرارت کالام میں 9 اور مالم جبہ میں 12 ڈگری سینٹی گریڈ ریکارڈ کیا گیا جبکہ ڈیرہ اسماعیل خان میں پارہ 45 ڈگری تک پہنچنے کی پیشگوئی کی گئی ہے۔