پشاور (ایم وائے کے نیوز ٹی وی) — خیبرپختونخوا کے مشیر اطلاعات بیرسٹر ڈاکٹر سیف نے مسلم لیگ ن کی چیف آرگنائزر اور پنجاب کی وزیر اعلیٰ مریم نواز پر سخت تنقید کرتے ہوئے الزام عائد کیا ہے کہ وہ خود کو اور اپنے والد میاں نواز شریف کو زبردستی ہیرو بنانے کی ناکام کوشش کر رہی ہیں۔ بیرسٹر سیف کا کہنا تھا کہ عوام اب ان کی حقیقت جان چکے ہیں، اور انہیں جعلی بیانیوں کے ذریعے مزید بے وقوف نہیں بنایا جا سکتا۔
نجی ٹی وی چینل سے گفتگو کرتے ہوئے بیرسٹر سیف نے الزام لگایا کہ مریم نواز ایسے عوامی منصوبے اپنے نام سے منسوب کر رہی ہیں، جن سے ان کا کوئی تعلق نہیں۔ ان کا کہنا تھا کہ "جو لوگ عوام کے ووٹوں سے منتخب ہی نہیں ہوئے، وہ عوامی منصوبوں کو اپنے نام سے منسوب کرنے کا حق کیسے رکھتے ہیں؟” انہوں نے مزید کہا کہ یہ وہی لوگ ہیں جنہیں "نہ تو تعلیم کا شعور ہے اور نہ سیکھنے کا جذبہ”۔ بیرسٹر سیف کے بقول بانی تحریک انصاف عمران خان پہلے ہی ان کی اس روش کو بے نقاب کر چکے ہیں۔ ان کا کہنا تھا کہ نواز شریف اور مریم نواز کو اگر کچھ اپنے نام سے منسوب کرنا ہی ہے تو لندن کے فلیٹس کر لیں، جو مبینہ طور پر عوام کے ٹیکسوں سے خریدے گئے۔
انہوں نے دعویٰ کیا کہ نواز شریف اور ان کی صاحبزادی جعلی فارم 47 کے ذریعے اسمبلیوں میں پہنچے ہیں اور عوام نے انہیں 8 فروری کے عام انتخابات میں واضح طور پر مسترد کیا۔ بیرسٹر سیف نے کہا، "ڈاکٹر یاسمین راشد نے نواز شریف کو شکست دی، لیکن ان کی واپسی اور اسمبلی میں آمد فارم 47 کے مرہون منت ہے۔” مشیر اطلاعات نے مزید کہا کہ قوم کو ایک ہیرو کی ضرورت ہے اور وہ ہیرو عمران خان ہے، جنہوں نے بین الاقوامی سطح پر پاکستان کا وقار بلند کیا۔ انہوں نے طنزیہ انداز میں سوال اٹھایا کہ "نواز شریف اور مریم نواز نے ایسا کیا کارنامہ انجام دیا ہے جس پر قوم فخر کرے؟”
بیرسٹر سیف نے واضح کیا کہ عوام اب باشعور ہیں اور وہ عوامی فلاح کے منصوبوں کو کسی سیاسی خاندان کی جاگیر نہیں سمجھتے۔ ان کا کہنا تھا کہ "عوام کے پیسوں سے بنائے گئے منصوبے صرف عوام کے ہیں، کسی خاندان کے ذاتی نام سے ان کی وابستگی عوامی مینڈیٹ کی توہین ہے
