پی ٹی آئی کا ناراض امیدواروں کے دستبردار نہ ہونیکی صورت میں اپوزیشن سے مقابلےکا فیصلہ

اسلام آباد (ایم وائے کے نیوز ٹی وی): تحریک انصاف نے واضح کر دیا ہے کہ اگر پارٹی کے ناراض سینیٹ امیدواروں نے کاغذات نامزدگی واپس نہ لیے تو وہ اپوزیشن سے سینیٹ کی نشستوں پر براہِ راست مقابلہ کرے گی، جس کے نتیجے میں حکومت اور اپوزیشن کے درمیان طے پانے والا سینیٹ سیٹوں کا 6، 5 کا بلامقابلہ معاہدہ ختم ہو جائے گا۔

ذرائع کے مطابق تحریک انصاف نے اپنے ناراض امیدواروں کو اتوار سے پہلے کاغذات واپس لینے کی ہدایت جاری کی ہے، بصورتِ دیگر ان کے خلاف تادیبی کارروائی کا عندیہ دیا گیا ہے۔ اس حوالے سے پارٹی کے اعلیٰ رہنماؤں اور امیدواروں کے درمیان دو اجلاس بھی ہو چکے ہیں، تاہم اب تک کوئی نتیجہ خیز پیش رفت سامنے نہیں آئی۔

تحریک انصاف کے چیئرمین بیرسٹر گوہر نے تصدیق کی کہ پہلا اجلاس وزیراعلیٰ خیبرپختونخوا علی امین گنڈاپور کی سربراہی میں ہوا جس میں ناراض امیدوار بھی شریک تھے، جبکہ دوسرا اجلاس ویڈیو کال پر رکھا گیا جس میں ناراض امیدواروں نے شرکت نہیں کی۔ ان کا کہنا تھا کہ اب معاملہ پارٹی کی پولیٹیکل کمیٹی کے سپرد کر دیا گیا ہے جس نے پارلیمانی پارٹی کے فیصلے کی توثیق بھی کر دی ہے۔

پولٹیکل کمیٹی نے بانی چیئرمین عمران خان کی ہدایت پر نامزد کردہ امیدواروں کو سپورٹ کرنے اور 6 نشستوں پر بلامقابلہ سینیٹ انتخابات میں حصہ لینے کے فیصلے کی منظوری دی ہے۔ پارٹی قیادت پرامید ہے کہ باقی امیدوار بھی اس فیصلے کا احترام کریں گے، بصورت دیگر کاغذات واپس نہ لینے والوں کے بارے میں نیا لائحہ عمل طے کیا جائے گا۔ اس حوالے سے سینیٹ کے ایک ناراض امیدوار عرفان سلیم نے بیان دیتے ہوئے کہا ہے کہ وہ پولیٹیکل کمیٹی کے فیصلے پر پارٹی ورکرز سے مشاورت کریں گے اور اس کے بعد ہی کوئی حتمی فیصلہ لیں گے۔