راولپنڈی میں مغل مارکیٹ کے قریب سی ٹی ڈی نے بڑی کارروائی کرتے ہوئے تھانہ آئی نائن پر حملے میں ملوث فتنے الخوارج کے دو انتہائی خطرناک دہشت گردوں، حمزہ اور رومان، کو گرفتار کر لیا۔ ترجمان سی ٹی ڈی کے مطابق، یہ کارروائی انٹیلی جنس معلومات کی بنیاد پر کی گئی۔
ترجمان نے بتایا کہ گرفتار دہشت گرد راولپنڈی اور اسلام آباد میں حساس مقامات پر دہشت گردی کے لیے مکمل ریکی کر چکے تھے اور افغانستان میں فتنے الخوارج کے ایک اہم کمانڈر کے ساتھ رابطے میں تھے۔ کارروائی کے دوران دہشت گردوں سے بھاری مقدار میں بارودی مواد، دستی بم، ڈیٹونیٹرز، سیفٹی فیوز، وائر اور دیگر تخریبی سامان برآمد ہوا۔ سی ٹی ڈی نے دہشت گردوں کے خلاف مقدمہ درج کر کے مزید تفتیش شروع کر دی ہے۔
ابتدائی تحقیقات میں دہشت گردوں نے انکشاف کیا کہ چند ماہ قبل تھانہ آئی نائن پر ہینڈ گرنیڈ حملہ بھی انہی کی کارروائی تھی۔ سی ٹی ڈی کے مطابق، مزید تحقیقات جاری ہیں تاکہ ان کے دیگر ساتھیوں اور نیٹ ورک کا پتہ چلایا جا سکے۔