اسلام آباد پولیس کے ایس پی انڈسٹریل ایریا عدیل اکبر مبینہ طور پر خودکشی کے باعث جاں بحق

اسلام آباد پولیس کے سینئر افسر ایس پی انڈسٹریل ایریا عدیل اکبر کی مبینہ خودکشی کی خبر نے دارالحکومت کی فضاء سوگوار بنا دی ہے۔
ابتدائی معلومات کے مطابق وہ آج شام سرینہ پوائنٹ کے قریب ڈیوٹی پر تعینات تھے جب اچانک انہیں ایک فون کال موصول ہوئی۔
عینی شاہدین کا کہنا ہے کہ کال سننے کے فوراً بعد عدیل اکبر نے اپنی سرکاری پستول سے خود پر فائر کیا، جس کے نتیجے میں وہ شدید زخمی ہو گئے۔

انہیں فوری طور پر پمز ہسپتال منتقل کیا گیا جہاں وہ زخموں کی تاب نہ لاتے ہوئے انتقال کر گئے۔
پمز ہسپتال میں اس وقت اسلام آباد پولیس کے اعلیٰ افسران موجود ہیں جبکہ واقعے کی تحقیقات کے لیے ٹیم تشکیل دے دی گئی ہے۔

پولیس حکام کے مطابق اس افسوسناک واقعے کے حوالے سے میڈیا کو جلد باضابطہ طور پر آگاہ کیا جائے گا۔
ادھر اسلام آباد اور راولپنڈی میں سکیورٹی ہائی الرٹ کر دی گئی ہے، اور ضلعی انتظامیہ سمیت پولیس کے سینیئر افسران موقع پر پہنچ چکے ہیں۔

ترجمان اسلام آباد پولیس کا مؤقف

اسلام آباد پولیس کے ترجمان کے مطابق، ایس پی عدیل اکبر شاہراہِ دستور سے دفتر کی جانب روانہ تھے کہ راستے میں اپنی گاڑی کے اندر فائر لگنے سے جاں بحق ہوگئے۔
ترجمان کا کہنا ہے کہ واقعے کی مکمل تحقیقات جاری ہیں اور ابتدائی شواہد اکٹھے کیے جا رہے ہیں۔

عدیل اکبر کا تعلیمی و پیشہ ورانہ پس منظر

اسلام آباد پولیس کے سرکاری بیان کے مطابق، ایس پی عدیل اکبر پولیس سروس آف پاکستان (PSP) کے انتہائی قابل اور پیشہ ور افسر تھے۔
وہ حال ہی میں انڈسٹریل ایریا کے ایس پی کے طور پر تعینات ہوئے تھے۔
انہوں نے نیشنل ڈیفنس یونیورسٹی (NDU) اسلام آباد سے گورننس اینڈ پبلک پالیسی میں ایم فل کی ڈگری حاصل کی تھی۔

انہوں نے اپنے کیریئر کا آغاز بلوچستان میں بطور اسسٹنٹ سپرنٹنڈنٹ پولیس (ASP) کے طور پر کیا، اور مختلف اضلاع میں نمایاں خدمات انجام دیں۔
ان کی پیشہ ورانہ مہارت میں سکیورٹی مینجمنٹ، کمیونٹی پولیسنگ، انسانی حقوق کا فروغ، انسدادِ دہشت گردی، اور بحرانوں سے نمٹنے کی صلاحیت شامل تھیں۔

اسلام آباد پولیس نے اپنے آفیشل فیس بک پیج پر انہیں خراجِ تحسین پیش کرتے ہوئے کہا ہے کہ

“ایس پی عدیل اکبر ایک فرض شناس، باکردار اور محنتی افسر تھے، ان کی خدمات ہمیشہ یاد رکھی جائیں گی۔”