ریلوے مسافروں کے لیے بری خبر: اہم ٹرین آج سے بند

کراچی سے لاہور اور راولپنڈی جانے والے مسافروں کے لیے بری خبر آ گئی، پاکستان ریلوے نے سر سید ایکسپریس کی سروس بند کرنے کا فیصلہ کر لیا۔ اس سلسلے میں باضابطہ نوٹیفکیشن بھی جاری کر دیا گیا ہے۔ نوٹیفکیشن کے مطابق کراچی سے راولپنڈی جانے والی سر سید ایکسپریس کو آج سے معطل کر دیا گیا ہے۔ یہ ٹرین راس لاجسٹکس کے تحت آؤٹ سورس کی گئی تھی اور پبلک پرائیویٹ پارٹنرشپ کے تحت چلائی جا رہی تھی۔ یہ ٹرین گزشتہ سال ستمبر 2023 میں بحال کی گئی تھی اور جدید سہولیات سے آراستہ تھی۔

سر سید ایکسپریس میں مسافروں کی سہولت کے لیے بہترین انتظامات کیے گئے تھے، جن میں ایک اے سی سلیپر، 3 اے سی بزنس اور 1 اے سی اسٹینڈرڈ کوچز، 8 اکانومی کوچز اور ڈائننگ کار، معیاری کھانے کی فراہمی کے لیے اعلیٰ کمپنی سے معاہدہ، صاف پانی اور صفائی ستھرائی کے خصوصی انتظامات، ٹرین میں فری وائی فائی کی سہولت اور آن لائن اور موبائل ایپ کے ذریعے ٹکٹ بکنگ کی سہولت شامل تھی

سر سید ایکسپریس کی اچانک بندش سے مسافروں کو شدید مشکلات کا سامنا کرنا پڑے گا، خاص طور پر ان افراد کے لیے جو کراچی سے لاہور اور راولپنڈی کے درمیان سفر کے لیے اس ٹرین کو ترجیح دیتے تھے۔ حکام کی جانب سے سر سید ایکسپریس کی معطلی کی وجوہات پر باضابطہ وضاحت نہیں دی گئی، تاہم امکان ظاہر کیا جا رہا ہے کہ انتظامی اور مالیاتی مسائل کی وجہ سے یہ فیصلہ کیا گیا ہے۔