پنجاب حکومت کا بڑا قدم: ٹریفک قوانین کی خلاف ورزی پر جرمانے 10 گنا بڑھا دیے گئے

لاہور (ایم وائے کے نیوز): پنجاب حکومت نے ٹریفک قوانین کی مسلسل خلاف ورزیوں اور بڑھتے حادثات کے پیش نظر انقلابی اقدامات اٹھاتے ہوئے جرمانوں میں دس گنا اضافہ کر دیا ہے۔ وزیراعلیٰ پنجاب مریم نواز کی زیر صدارت ایک اعلیٰ سطحی اجلاس میں فیصلہ کیا گیا کہ کم عمر ڈرائیونگ کے خلاف سخت ایکشن لیا جائے گا، اور اس جرم کے ذمہ دار والدین کے خلاف مقدمات درج کیے جائیں گے۔

وزیراعلیٰ مریم نواز نے اجلاس کے دوران کہا کہ لاہور اور دیگر شہروں میں ٹریفک نظام بہتر نظر نہیں آ رہا، اب زبانی ہدایات سے بات نہیں بنے گی بلکہ ٹھوس اور پائیدار عملی اقدامات ناگزیر ہو چکے ہیں۔ انہوں نے مزید کہا کہ وہ خود مختلف سڑکوں پر ٹریفک کی صورتحال کا مشاہدہ کر رہی ہیں اور اصلاحات پر کوئی سمجھوتہ نہیں کیا جائے گا۔اجلاس میں یہ بھی طے پایا کہ خطرناک ڈرائیونگ، اوورلوڈنگ، اور دوران ڈرائیونگ موبائل فون استعمال کرنے جیسے عوامل پر نہ صرف بھاری جرمانے عائد کیے جائیں گے بلکہ متعلقہ گاڑی کو بند بھی کیا جا سکے گا۔