ایل پی جی بائوزر دھماکوں پر سینیٹ کی قائمہ کمیٹی کا سخت نوٹس

اسلام آباد:ملتان اور ڈیرہ غازی خان میں غیر قانونی ایل پی جی باؤزر (ٹینکرز)میں دھماکوں کے واقعات پر سینیٹ کی قائمہ کمیٹی برائے کابینہ سیکرٹریٹ نے سخت نوٹس لیتے ہوئے چیئرمین اوگرا کو ذاتی حیثیت میں طلب کر لیا گیا ہے۔
کمیٹی نے اوگرا سمیت تمام متعلقہ اداروں سے واقعے کی تفصیلات اور اس پر کیے گئے اقدامات کی وضاحت بھی طلب کر لی ہے۔
نوٹس میں کہا گیا ہے کہ غیر قانونی ایل پی جی باؤزر کے دھماکوں کے نتیجے میں ملتان میں قیمتی جانیں ضائع ہوئیں، جس میں 6 افراد جاں بحق اور 38 زخمی ہوئے، جبکہ دھماکے سے گھروں اور متعدد گاڑیوں کو بھی نقصان پہنچا۔
اس کے علاوہ، اوگرا سے غیر قانونی باؤزرز کی روک تھام کے لیے کیے گئے اقدامات کی مکمل رپورٹ پیش کرنے کا مطالبہ کیا گیا ہے۔
واضح رہے کہ گزشتہ تین روز کے دوران مختلف شہروں میں ایل پی جی باؤزر پھٹنے کے واقعات پیش آئے، جن میں پہلا واقعہ ملتان اور دوسرا ڈیرہ غازی خان میں پیش آیا۔