محکمہ موسمیات نے آئندہ 24 گھنٹوں کے دوران ملک کے مختلف علاقوں میں آندھی، گرج چمک اور تیز ہواؤں کے ساتھ بارش کی پیشگوئی کی ہے۔ محکمہ کے مطابق اسلام آباد، خطہ پوٹھوہار، شمال مشرقی پنجاب، بالائی خیبرپختونخوا، کشمیر اور گلگت بلتستان میں مطلع جزوی ابر آلود رہے گا، جبکہ بعض مقامات پر موسلادھار بارش اور ژالہ باری کا بھی امکان ہے۔
محکمہ موسمیات کا کہنا ہے کہ کشمیر، خطہ پوٹھوہار اور بالائی خیبرپختونخوا میں بعض مقامات پر شدید بارش کے ساتھ ژالہ باری کا خدشہ موجود ہے۔ ان علاقوں کے رہائشیوں کو احتیاطی تدابیر اختیار کرنے کی ہدایت کی گئی ہے تاکہ کسی بھی ممکنہ نقصان سے بچا جا سکے۔
دوسری جانب کراچی میں موسم شدید گرم اور خشک رہنے کا امکان ظاہر کیا گیا ہے۔ محکمہ موسمیات کے مطابق شہر میں درجہ حرارت 41 ڈگری سینٹی گریڈ تک پہنچنے کا امکان ہے، جس کے باعث شہریوں کو دھوپ سے بچنے اور زیادہ پانی پینے کی ہدایت کی گئی ہے۔
خیبرپختونخوا کے مختلف علاقوں بشمول پشاور میں بھی مزید بارش کا امکان ظاہر کیا گیا ہے۔ محکمہ موسمیات نے اسلام آباد اور راولپنڈی میں طوفان اور ژالہ باری کا الرٹ جاری کرتے ہوئے عوام کو احتیاط برتنے کا مشورہ دیا ہے۔
