بچوں سے متعلق بیان پر رجب بٹ نے معذرت کرلی

معروف یوٹیوبر رجب بٹ نے بچوں کے جنسی استحصال جیسے حساس موضوع پر نامناسب مذاق کرنے پر معذرت کر لی۔

چند روز قبل رجب بٹ اور زید علی ٹی کی ٹک ٹاک لائیو کی ایک ویڈیو سوشل میڈیا پر وائرل ہوئی تھی، جس میں رجب بٹ نے زید علی کے تاثرات پر تبصرہ کرتے ہوئے بچوں کے جنسی استحصال جیسے حساس موضوع کو مذاق کے طور پر استعمال کیا، جس پر سوشل میڈیا صارفین کی جانب سے انہیں شدید تنقید کا سامنا کرنا پڑا۔

بعد ازاں رجب بٹ نے انسٹاگرام اسٹوری کے ذریعے اپنے الفاظ پر معذرت کرتے ہوئے کہا کہ ویڈیو میں کہی گئی بات انتہائی نامناسب تھی اور اس نوعیت کا مذاق کسی صورت قابلِ قبول نہیں۔

یوٹیوبر نے کہا کہ اس قسم کے مذاق بدقسمتی سے معاشرے، خصوصاً لڑکوں کی محفلوں میں معمول بن چکے ہیں، تاہم کسی چیز کا عام ہونا اسے درست یا قابلِ قبول نہیں بنا دیتا۔ ان کے مطابق ملک میں بچوں کے جنسی استحصال جیسے حساس مسئلے کی سنگینی کو دیکھتے ہوئے انہیں اپنے الفاظ کے حوالے سے زیادہ محتاط ہونا چاہیے تھا۔

رجب بٹ نے ان تمام افراد سے بھی معافی مانگی جن کے جذبات ان کے الفاظ سے مجروح ہوئے یا جن کے ماضی کے صدمات دوبارہ تازہ ہوئے۔ انہوں نے واضح کیا کہ اگرچہ وائرل ہونے والی ویڈیو پرانی ہے، تاہم ویڈیو کا پرانا ہونا ان کے الفاظ کا جواز نہیں بن سکتا۔

رجب بٹ کے مطابق وہ اپنی غلطیوں سے سیکھنے اور مستقبل میں اپنے الفاظ اور ان کے ممکنہ اثرات کے حوالے سے زیادہ ذمہ دار اور محتاط رہنے کی کوشش کریں گے۔