ہانگ کانگ کے کھلاڑی نے ٹی 20 میں نیا عالمی ریکارڈ قائم کر دیا
ہانگ کانگ: ہانگ کانگ کی قومی ٹیم کے فاسٹ بولر آیش شکلا نے ٹی 20 انٹرنیشنل کرکٹ میں نئی تاریخ رقم کر دی ہے۔ آیش شکلا نے منگولیا کے خلاف میچ میں شاندار کارکردگی کا مظاہرہ کرتے ہوئے اپنے اسپیل کے تمام چار اوورز میڈن کرائے، یعنی ان چاروں اوورز میں انہوں نے ایک بھی رن نہیں دیا۔ یہ کارنامہ آیش شکلا نے اس وقت انجام دیا جب ان کی ٹیم کو مضبوط کارکردگی کی ضرورت تھی۔
آیش شکلا اس کامیابی کے ساتھ ٹی 20 انٹرنیشنل میں اپنے اسپیل کے چاروں اوورز میڈن کرانے والے دنیا کے تیسرے اور مجموعی طور پر چوتھے بولر بن گئے ہیں۔ ٹی 20 انٹرنیشنل کرکٹ میں 24 گیندوں پر مشتمل اسپیل میں ایک بھی رن نہ دینے والوں میں کینیڈا کے سعد بن ظفر اور نیوزی لینڈ کے لوکی فرگوسن بھی شامل ہیں۔ بھارتی ڈومیسٹک کرکٹ میں اکشے کارنیوار نے بھی یہ کارنامہ انجام دیا تھا۔
آیش شکلا کی یہ کارکردگی نہ صرف ان کی اپنی ٹیم بلکہ بین الاقوامی کرکٹ میں بھی ایک اہم لمحہ ہے۔ ان کی میچ میں نمایاں کارکردگی نے ہانگ کانگ کی ٹیم کی جیت میں اہم کردار ادا کیا۔ آیش شکلا کی یہ کامیابی کرکٹ کے شائقین کے لیے ایک متاثر کن مثال قائم کرتی ہے اور ان کے مستقبل کے لیے امید افزا ہے۔
