سابق فاسٹ بولر محمد آصف کی 2026 ورلڈکپ سے متعلق چونکا دینے والی پیشگوئی

سابق فاسٹ بولر محمد آصف کی 2026 ورلڈکپ سے متعلق چونکا دینے والی پیشگوئی

اسلام آباد: پاکستان کے سابق فاسٹ بولر محمد آصف نے 2026 میں ہونے والے ٹی ٹوئنٹی ورلڈکپ کے حوالے سے قومی ٹیم کی کارکردگی پر تنقید کرتے ہوئے ایک بڑی پیشگوئی کی ہے۔ محمد آصف نے کہا کہ جس طرح کی صورتحال اس وقت پاکستان کرکٹ ٹیم کی ہے، وہ 2026 کے ورلڈکپ میں بھی امریکا سے شکست کھا سکتی ہے۔

ایک پوڈکاسٹ میں گفتگو کرتے ہوئے محمد آصف نے کہا، ہم 2024 کے ورلڈکپ میں امریکا سے ہارے، جو کہ پہلی بار یہ ایونٹ کھیل رہا تھا اور میزبان ہونے کی وجہ سے کوالیفائی کیے بغیر ہی حصہ لے رہا تھا۔

سابق کرکٹر کا کہنا تھا کہ مجھے اس بات کی ضمانت ہے کہ اگلے ورلڈکپ میں بھی امریکا پاکستان کو ہرائے گا، اگر ہم نے اپنی ٹیم کی کارکردگی اور حکمت عملی کو بہتر نہ بنایا۔

محمد آصف نے ٹیم کی موجودہ صورتحال پر کڑی تنقید کی اور کہا کہ 2026 کے ورلڈکپ سے پہلے کپتان، کوچ اور کھلاڑیوں کو تبدیل کرنے کی اشد ضرورت ہے۔ ہمیں دو سال کی حکمت عملی بنانی ہوگی، جس میں 20 کھلاڑیوں کی نشاندہی کی جائے جن کے ساتھ ہم آگے بڑھنا چاہتے ہیں، مگر بدقسمتی سے ہم بار بار وہی غلطیاں دہرا رہے ہیں۔انہوں نے بھارتی اور جنوبی افریقی ٹیموں کی مثال دیتے ہوئے کہا کہ بھارت اور جنوبی افریقا جیسے ممالک تیزی سے ترقی کر رہے ہیں جبکہ ہماری ٹیم ایک ہی جگہ پر رک گئی ہے۔

ہمارے کھلاڑیوں کو اپنی کارکردگی اور منصوبہ بندی میں بہتری لانے کی ضرورت ہے۔واضح رہے کہ 7 جون 2024 کو امریکا نے ٹی ٹوئنٹی ورلڈکپ میں پاکستان کو سپر اوور میں شکست دے کر ایک بڑا اپ سیٹ کیا تھا۔ یہ امریکا کی کرکٹ میں پہلی بڑی جیت تھی، جس نے دنیا بھر کے کرکٹ حلقوں میں ہلچل مچا دی۔ پاکستان کی ٹیم حالیہ عرصے میں تنقید کی زد میں ہے، نہ صرف ٹی ٹوئنٹی ورلڈکپ میں ناقص کارکردگی کی وجہ سے بلکہ بنگلہ دیش کے خلاف ٹیسٹ سیریز میں بھی ٹیم کی کارکردگی مایوس کن رہی۔