نیوزی لینڈ کو چیمپئنز ٹرافی سے قبل ایک اور بڑا جھٹکا۔ ایک اور اہم کھلاڑی ان فٹ قرار

آئی سی سی چیمپئنز ٹرافی کا آغاز آج سے ہو رہا ہے اور افتتاحی میچ میں پاکستان کا مقابلہ نیوزی لینڈ سے ہوگا۔ تاہم اس بڑے میچ سے قبل کیویز کو یہ بڑا دھچکا لگا ہے جب فاسٹ بولر لوکی فرگوسن کراچی کے نیشنل اسٹیڈیم میں اتوار کو کھیلے گئے وارم اپ میچ میں پاؤں کی چوٹ کے باعث چیمپئنز ٹرافی 2025 سے باہر ہو گئے۔فرگوسن کو بالنگ اسپیل کے دوران دائیں پاؤں میں درد محسوس ہوا، جس کے بعد وہ میدان سے باہر چلے گئے تھے۔ نیوزی لینڈ کرکٹ بورڈ نے تصدیق کی ہے کہ میڈیکل پینل کے مطابق فرگوسن ٹورنامنٹ کے لیے فٹ نہیں ہوں گے۔

نیوزی لینڈ کے ہیڈ کوچ گیری اسٹیڈ نے فرگوسن کی انجری پر مایوسی کا اظہار کرتے ہوئے کہا کہ وہ ہماری بولنگ لائن کا اہم حصہ تھے اور ان کے باہر ہونے سے ٹیم کو بڑا نقصان پہنچ سکتا ہے۔ نیوزی لینڈ کرکٹ بورڈ نے فرگوسن کی انجری کے بعد فاسٹ بولر کائل جیمیسن کو اسکواڈ میں شامل کر لیا ہے۔ جیمیسن گزشتہ 10 ماہ سے کمر کی فریکچر کے باعث کرکٹ سے دور تھے۔

اس سے پہلے نیوزی لینڈ کے فاسٹ بولر بین سیئرز بھی آئی سی سی چیمپئنز ٹرافی سے باہر ہو گئے تھے۔ چیمپئنز ٹرافی میں اب تک کئی اہم کھلاڑی زخمی ہو کر میگا ایونٹ سے باہر ہو چکے ہیں، جن میں پاکستان کے صائم ایوب، بھارت کے جسپرت بمراہ، آسٹریلیا کے کپتان پیٹ کمنز اور دیگر 4 کینگرو کھلاڑی شامل ہیں۔