لندن (ایم وائے کے نیوز) کرکٹ کی دنیا میں ایک ایسا انوکھا اور ناقابل یقین واقعہ پیش آیا ہے جس نے شائقین کرکٹ کو حیرت میں ڈال دیا۔ رچمنڈ کرکٹ کلب کی فورتھ الیون ٹیم، جو 427 رنز کا ہدف حاصل کرنے میدان میں اتری تھی، صرف 2 رنز پر ڈھیر ہو گئی۔ تفصیلات کے مطابق یہ میچ مڈل سیکس کاؤنٹی لیگ میں ہفتے کے روز کھیلا گیا جہاں نارتھ لندن کرکٹ کلب نے پہلے بیٹنگ کرتے ہوئے صرف 6 وکٹوں کے نقصان پر 45 اوورز میں 426 رنز کا پہاڑ جیسا مجموعہ کھڑا کیا۔
جب رچمنڈ کی بیٹنگ کا آغاز ہوا تو معاملہ یکسر مختلف رخ اختیار کر گیا۔ پوری ٹیم صرف 5.4 اوورز میں پویلین واپس لوٹ گئی۔ حیرت انگیز طور پر 10 میں سے 8 بلے باز بغیر کوئی رن بنائے آؤٹ ہوئے، جبکہ اسکور بورڈ پر موجود 2 رنز میں سے 1 رن ایک بیٹر نے بنایا اور دوسرا رن وائیڈ بال کی بدولت حاصل ہوا۔ یہ اسکور کرکٹ کی تاریخ کے کم ترین ٹیم اسکورز میں سے ایک ہے، اور خاص طور پر ایک ایسے مقابلے میں جہاں ہدف 400 سے زائد کا ہو، اتنی جلدی ہار جانا ایک ریکارڈ جیسا محسوس ہوتا ہے۔
رچمنڈ کرکٹ کلب نے اپنی شرمناک شکست پر سماجی رابطے کی ویب سائٹ ایکس (ٹوئٹر) پر ایک مزاحیہ مگر افسوسناک پوسٹ کی، جس میں اعتراف کیا کہ یہ نتیجہ فخر کا باعث نہیں۔ ساتھ ہی انہوں نے اپنی دوسری، تیسری اور پانچویں ٹیموں کی جیت کا ذکر کر کے کچھ عزت بچانے کی کوشش کی۔
