واشنگٹن (ایم وائے کے نیوز) واٹس ایپ نے پرانے سمارٹ فونز کے لیے سپورٹ باضابطہ طور پر ختم کرنے کا اعلان کیا ہے، جس کا اطلاق یکم جون 2025 سے ہو چکا ہے۔ تفصیلات کے مطابق کچھ پرانے آئی فونز اور اینڈرائیڈ فونز پر اب واٹس ایپ انسٹال یا استعمال کرنا ممکن نہیں رہا۔ کمپنی کے مطابق اس اقدام کا مقصد ایپ کی سیکیورٹی، رفتار اور کارکردگی کو بہتر بنانا ہے، کیونکہ جدید فیچرز اور پرائیویسی اپڈیٹس صرف نئے آپریٹنگ سسٹمز پر مؤثر طریقے سے کام کرتے ہیں۔
واٹس ایپ نے واضح کیا ہے کہ اب صرف وہ آئی فونز واٹس ایپ کے اہل ہوں گے جن میں کم از کم iOS 15.1 یا اس کے بعد کے ورژن انسٹال ہوں۔ اینڈرائیڈ صارفین کے لیے شرط ہے کہ ان کی ڈیوائسز میں کم از کم اینڈرائیڈ 5.0 یا اس کے بعد کا آپریٹنگ سسٹم ہونا چاہیے۔ اس فیصلے کے نتیجے میں متعدد پرانے فونز پر واٹس ایپ بند ہو چکا ہے، جن میں نمایاں جیسے آئی فون 5 ایس، آئی فون 6، گلیکسی ایس 3، ایچ ٹی سی ون ایکس اور سونی ایکسپیریا زی ماڈلز شامل ہیں۔
بعض رپورٹس کے مطابق آئی فون 6 ایس، 6 ایس پلس اور پہلا آئی فون ایس ای بھی متاثر ہو سکتے تھے، تاہم یہ ماڈلز iOS 15.8.4 پر اپڈیٹ کیے جا سکتے ہیں، اس لیے یہ کچھ عرصے کے لیے واٹس ایپ پر کام کرتے رہیں گے۔ کمپنی کا کہنا ہے کہ ہر سال وہ ان ڈیوائسز کا جائزہ لیتی ہے جن کے صارفین بہت کم رہ جاتے ہیں یا جو سیکیورٹی اپڈیٹس حاصل کرنے کے قابل نہیں ہوتے۔ ان میں اکثر ایسے فنکشنز کی بھی کمی ہوتی ہے جو واٹس ایپ کی کارکردگی کے لیے ضروری ہوتے ہیں۔ یہی وجہ ہے کہ واٹس ایپ کی جانب سے ایسے پرانے فونز کے لیے سپورٹ بند کر دی جاتی ہے۔
اس تبدیلی سے زیادہ تر وہ افراد متاثر ہوں گے جو ابھی تک پرانے ماڈلز پر انحصار کر رہے ہیں۔ ایک تخمینے کے مطابق اب بھی دنیا بھر میں ایک فیصد کے قریب اینڈرائیڈ فونز ایسے ہیں جو پرانے آپریٹنگ سسٹمز پر چل رہے ہیں۔ واٹس ایپ صارفین کو مشورہ دیا گیا ہے کہ اگر وہ ایپ کو مسلسل استعمال میں رکھنا چاہتے ہیں تو جلد از جلد اپنی ڈیوائسز اپگریڈ کر لیں۔
