اسلام آباد(ایم وائے کے نیوز ٹی وی) عالمی ٹیکنالوجی کمپنی مائیکروسافٹ نے پاکستان میں اپنے 25 سالہ آپریشنز بند کر دیے ہیں۔ یہ آپریشنز جون 2000 میں شروع کیے گئے تھے اور اب ان کا اختتام مبینہ طور پر ایک خاموش فیصلے کے ساتھ کیا جا رہا ہے۔ کمپنی کے پہلے کنٹری منیجر، جواد رحمان نے لنکڈاِن پر ایک جذباتی پوسٹ میں اس خبر کی تصدیق کرتے ہوئے اسے "ایک دور کا اختتام” قرار دیا اور بتایا کہ پاکستان میں موجود باقی چند ملازمین کو حال ہی میں اس فیصلے سے آگاہ کیا گیا۔
اس خبر نے پاکستان کے ٹیکنالوجی سیکٹر میں ہلچل مچا دی، تاہم پاکستان کی وزارت آئی ٹی اینڈ ٹیلی کام اور دیگر سرکاری ذرائع نے اس تاثر کو رد کیا ہے کہ مائیکروسافٹ نے ملک سے مکمل انخلا کر لیا ہے۔ وزارت نے 4 جولائی کو جاری کردہ ایک بیان میں وضاحت کی کہ یہ فیصلہ مائیکروسافٹ کی عالمی تنظیمِ نو کا حصہ ہے اور کمپنی پاکستان کو نہیں چھوڑ رہی۔ مائیکروسافٹ کے ترجمان نے اس تبدیلی کو ایک "کاروباری جائزے اور اصلاح” کا نتیجہ قرار دیا ہے۔ ان کا کہنا ہے کہ کمپنی اب پاکستان میں براہ راست آپریشنز کی بجائے علاقائی دفاتر (جیسے دبئی یا آئرلینڈ) اور مقامی شراکت داروں کے ذریعے اپنی خدمات جاری رکھے گی، جیسا کہ وہ دنیا کے کئی دیگر ممالک میں پہلے ہی کر رہی ہے۔ ترجمان نے مزید وضاحت کی کہ اس فیصلے کا صارفین کے معاہدوں یا سروسز پر کوئی منفی اثر نہیں پڑے گا۔
وزارت آئی ٹی کے مطابق مائیکروسافٹ نے پچھلے کچھ سالوں میں اپنی کمرشل مینجمنٹ یورپ کے آئرلینڈ میں منتقل کر دی تھی، اور پاکستان میں اس کی عملی موجودگی پہلے ہی محدود تھی۔ اب کمپنی پارٹنر بیسڈ اور کلاؤڈ بیسڈ ماڈل پر منتقل ہو رہی ہے، جو موجودہ عالمی رجحانات کے عین مطابق ہے۔ پاکستان سافٹ ویئر ہاؤسز ایسوسی ایشن کے رکن محمد راحیل کے مطابق مائیکروسافٹ کا پاکستانی عملہ ہمیشہ محدود ہی رہا، جو تقریباً پانچ افراد پر مشتمل تھا۔ ان کی بنیادی ذمہ داری انٹرپرائز، تعلیم اور سرکاری شعبوں سے رابطہ رکھنا تھی، جبکہ زیادہ تر سروسز مقامی شراکت داروں جیسے سسٹمز لمیٹڈ کے ذریعے فراہم کی جاتی تھیں۔
تجزیہ کاروں کا کہنا ہے کہ مائیکروسافٹ کی عالمی حکمت عملی اب کلاؤڈ بیسڈ سروسز (جیسے Azure اور Microsoft 365) اور پارٹنر نیٹ ورک پر مرکوز ہے، جس کے باعث چھوٹے مقامی دفاتر کی ضرورت تقریباً ختم ہو چکی ہے۔ اگرچہ کمپنی کے مقامی دفتر کی بندش بظاہر ایک اہم تبدیلی ہے، لیکن اس کا مطلب یہ نہیں کہ مائیکروسافٹ پاکستان سے مکمل طور پر رخصت ہو چکی ہے۔ مستقبل میں یہ واضح ہوگا کہ یہ نئی حکمت عملی ملک میں ٹیکنالوجی کی ترقی پر کس حد تک اثر انداز ہوتی ہے۔
