واٹس ایپ کا اہم نیا قدم: صارفین سے معاوضہ لینے کی تیاری

نیویارک (ایم وائے کے نیوز) — انسٹنٹ میسجنگ ایپ واٹس ایپ نے ایک نئے فیچر کا اعلان کیا ہے جس کے تحت اب کچھ خدمات کے لیے صارفین کو معاوضہ ادا کرنا ہوگا۔ میٹا (Meta) کی ملکیتی اس ایپ نے واضح کیا ہے کہ مرکزی چیٹنگ فیچرز اب بھی مفت رہیں گے، لیکن چینلز اور اسٹیٹس کے اندر نئی مالیاتی تبدیلیاں متعارف کرائی جا رہی ہیں۔

نئی پالیسی کے تحت واٹس ایپ چینلز کے مالکان کو اختیار دیا جا رہا ہے کہ وہ اپنی چینلز پر ماہانہ سبسکرپشن فیس مقرر کر سکیں، جس کے بعد صرف فیس ادا کرنے والے صارفین ہی چینل کی تازہ اپ ڈیٹس حاصل کر سکیں گے۔ مزید یہ کہ چینل مالکان اپنے چینلز کی تشہیر بھی کر سکیں گے جس کے لیے انہیں کچھ رقم ادا کرنا ہو گی۔

اس کے علاوہ، کمپنی واٹس ایپ کے اسٹیٹس فیچر میں اشتہارات شامل کرنے کی تیاری بھی کر رہی ہے، جیسا کہ انسٹاگرام یا فیس بک پر ہوتا ہے۔ ان تمام تبدیلیوں کا مقصد پلیٹ فارم کو کاروباری اور تجارتی سطح پر مزید مؤثر اور منافع بخش بنانا ہے۔کمپنی کے مطابق یہ نئے فیچرز آئندہ چند ماہ میں بتدریج عالمی سطح پر متعارف کرائے جائیں گے۔