سوشل میڈیا پر جعلی وارنٹ پوسٹ کرنے والا شہری گرفتار

چین میں ایک شخص کو اپنی گرفتاری کا جعلی وارنٹ سوشل میڈیا پر پوسٹ کرنے کے جرم میں گرفتار کر لیا گیا۔

ساؤتھ چائنا مارننگ پوسٹ کے مطابق، 11 نومبر کو وینگ نامی شہری نے اپنی تصویر کے ساتھ ایک جعلی "وانٹڈ آرڈر” شیئر کیا، جس میں اس نے خود کو مشہور اداکار اور ڈانسر وینگ ییبو ظاہر کیا اور دعویٰ کیا کہ وہ مفرور ہے۔

جعلی وارنٹ میں وینگ نے لکھا کہ وہ چن یوان کاؤنٹی کا رہائشی ہے اور 10 نومبر 2024 کو ایک کمپنی سے 3 کروڑ یوان بھتہ وصول کیا ہے۔ مزید براں، اس نے یہ بھی لکھا کہ اس کے پاس ایک سب مشین گن اور 500 گولیاں ہیں، اور جو بھی اسے گرفتار کرے گا اسے 30 ہزار یوان انعام دیا جائے گا۔

یہ پوسٹ تیزی سے وائرل ہوئی اور محض 24 گھنٹوں میں 3 لاکھ 50 ہزار ویوز، 2500 لائیکس، 80 کمنٹس اور 1155 شیئرز حاصل کر گئی۔

دلچسپ بات یہ ہے کہ یہ جعلی پوسٹ صرف عوام تک محدود نہیں رہی بلکہ چن یوان پولیس کی نظر میں بھی آگئی۔ پولیس نے فوری کارروائی کرتے ہوئے 12 نومبر کو وینگ کو گرفتار کر لیا۔

تفتیش کے دوران پولیس نے تصدیق کی کہ وینگ کے پاس نہ تو کوئی اسلحہ تھا اور نہ ہی اس نے کسی کمپنی سے بھتہ وصول کیا تھا۔ وینگ نے اعتراف کیا کہ اس نے یہ سب صرف وقت گزاری اور بوریت سے بچنے کے لیے کیا تھا۔