کینیڈا کا جوابی اقدام: امریکی درآمدات پر 25 فیصد اضافی ٹیرف عائد کرنے کا اعلان

امریکی صدر ڈونلڈ ٹرمپ کی جانب سے کینیڈین درآمدات پر اضافی ٹیرف عائد کرنے کے اعلان کے بعد، کینیڈا نے بھی جوابی کارروائی کرتے ہوئے امریکی مصنوعات پر اضافی 25 فیصد تجارتی ٹیرف لگانے کا اعلان کیا ہے۔ غیر ملکی خبر رساں ادارے کے مطابق کینیڈا کے وزیراعظم جسٹن ٹروڈو نے واضح کیا کہ 155 ارب ڈالر کی امریکی اشیاء پر 25 فیصد اضافی محصولات عائد کیے جائیں گے۔ ان کا کہنا تھا کہ یہ ٹیرف اس وقت تک برقرار رہیں گے جب تک امریکا اپنے تجارتی محصولات ختم نہیں کرتا۔

وزیراعظم جسٹن ٹروڈو نے امریکی فیصلے پر تنقید کرتے ہوئے کہا کہ امریکا ایک طرف کینیڈا کے ساتھ تجارتی جنگ چھیڑ رہا ہے جبکہ دوسری طرف روس سے مثبت تعلقات قائم کرنے کی بات کر رہا ہے۔ انہوں نے اعلان کیا کہ کینیڈا یہ معاملہ عالمی تجارتی تنظیم (WTO) میں لے کر جائے گا۔ انہوں نے امریکی صدر ڈونلڈ ٹرمپ کو پیغام دیا کہ شمالی امریکا کی خوشحالی کے لیے دونوں ممالک کو مل کر کام کرنا چاہیے، کیونکہ ہماری آپسی لڑائی ہمارے دشمنوں کے مفاد میں ہے۔ دوسری جانب، امریکی اور کینیڈین حکام کے درمیان صدر ٹرمپ کے نافذ کردہ ٹیرف میں کمی یا خاتمے کے لیے بات چیت جاری ہے۔ امریکی میڈیا رپورٹس کے مطابق امریکا اور کینیڈا کے درمیان تجارتی معاہدے کے امکانات بھی موجود ہیں۔