عیدالفطر 2025: پاکستان، سعودی عرب اور متحدہ عرب امارات میں کتنی چھٹیاں ہوں گی؟

دبئی/ریاض/اسلام آباد: دنیا بھر کے مسلمان رمضان المبارک کے اختتام پر عیدالفطر منانے کی تیاری کر رہے ہیں، اور اس موقع پر مختلف ممالک میں تعطیلات کا اعلان بھی کیا جا رہا ہے۔

متحدہ عرب امارات کی کابینہ کے طے کردہ تعطیلات کے کیلنڈر کے مطابق عیدالفطر کے لیے شوال کے پہلے، دوسرے اور تیسرے دن عام تعطیل ہوگی۔ تاہم، اس سال چاند کی رویت کی وجہ سے زیادہ تعطیلات متوقع ہیں۔ اگر شوال کا چاند 29 مارچ (ہفتہ) کی شام کو نظر آ گیا، تو عید 30 مارچ (اتوار) کو ہوگی، اور سرکاری تعطیلات اتوار سے منگل (30 مارچ تا 1 اپریل) تک جاری رہیں گی، جس سے زیادہ تر ملازمین کو 4 دن کا طویل ویک اینڈ ملے گا۔ لیکن اگر چاند ہفتہ کو نظر نہیں آتا اور رمضان 30 دن کا مکمل ہوتا ہے، تو عید 31 مارچ (پیر) کو ہوگی، جس کے نتیجے میں تعطیلات بدھ (3 اپریل) تک جاری رہیں گی، یعنی 5 دن کا طویل ویک اینڈ ممکن ہے۔

سعودی عرب میں بھی عیدالفطر 30 یا 31 مارچ کو ہونے کا امکان ہے، جو چاند کی رویت پر منحصر ہے۔ تاہم، سعودی وزارت افرادی قوت نے نجی اور غیر منافع بخش اداروں کے لیے عیدالفطر کی 4 چھٹیوں کا باضابطہ اعلان کر دیا ہے۔ سعودی حکومت کی جانب سے اتوار 30 مارچ سے بدھ 2 اپریل تک چھٹیاں دی جائیں گی۔ اس کے علاوہ عیدالاضحی پر 6 روز کی چھٹیوں کا بھی اعلان کیا گیا ہے۔

پاکستان میں ماہرین فلکیات کے مطابق رمضان المبارک 29 دنوں پر مشتمل ہوگا، اور عیدالفطر 31 مارچ (پیر) کو ہونے کا امکان ہے۔ 30 مارچ (اتوار) کی شام عید کا چاند نظر آنے کی پیش گوئی کی گئی ہے۔ غروب آفتاب کے وقت چاند کی عمر 26 گھنٹے ہوگی، جو واضح رویت کے لیے کافی ہے۔ اگر چاند نظر آ گیا، تو عید 31 مارچ (پیر) کو ہوگی، لیکن اگر رمضان 30 دنوں کا ہوا تو عید 1 اپریل (منگل) کو منائی جائے گی۔ سرکاری طور پر 3 سے 4 دن کی تعطیلات متوقع ہیں، جس کا حتمی اعلان جلد کیا جائے گا۔