فرانسیسی پولیس نے منگل کے روز اُن چوروں کی تلاش تیز کر دی جنہوں نے لوور میوزیم سے قیمتی شاہی زیورات دن دیہاڑے ایک حیران کن واردات میں چرا لیے۔
پیر کے روز مسلسل دوسرے دن میوزیم بند رہا جبکہ حکام نے بتایا کہ ساٹھ تفتیش کار اس مفروضے پر کام کر رہے ہیں کہ یہ چوری کسی منظم جرائم پیشہ گروہ نے کی ہے، جس میں نو قیمتی زیورات چرا لیے گئے۔ بھاگتے ہوئے چوروں نے پیرس کی گلیوں میں ہیروں سے جڑا ایک تاج گرا دیا جس میں 1300 سے زائد ہیروں کی جڑائی تھی۔
تحقیقات کاروں نے لوور کے اردگرد اور پیرس سے باہر جانے والی شاہراہوں کی ویڈیو فوٹیجز کی جانچ شروع کر دی تاکہ ان چار چوروں کا سراغ لگایا جا سکے جو اتوار کی صبح اسکوٹرز پر فرار ہوئے۔
وزیر داخلہ لوران نونیئز نے کہا، "بہت سی ویڈیوز موجود ہیں، اور یہ تفتیش کاروں کے اہم کاموں میں سے ایک ہے۔”
تاہم جیسے ہی مایوس سیاح دنیا کے سب سے زیادہ دیکھے جانے والے میوزیم کے لیے دوبارہ ٹکٹیں بک کروا رہے تھے، یہ محض سات منٹ کی ڈکیتی فرانسیسی عجائب گھروں میں سیکیورٹی کی کمی پر بحث کو دوبارہ بھڑکا گئی — خاص طور پر جب پچھلے مہینے دو دوسرے میوزیمز کو بھی نشانہ بنایا گیا تھا۔
وزیر انصاف جیرالڈ دارماناں نے لوور میں سیکیورٹی کی خامیوں کا اعتراف کیا۔
انہوں نے فرانس انٹر ریڈیو سے بات کرتے ہوئے کہا،
"یقیناً ہم ناکام ہوئے ہیں، کیونکہ لوگ پیرس کے بیچوں بیچ ایک فرنیچر لفٹ کھڑی کر کے چند منٹوں میں اوپر چڑھ کر قیمتی زیورات چرا کر لے گئے — جس نے فرانس کی بدنامی کی۔”
نونیئز نے ثقافتی مقامات کے اردگرد بہتر سیکیورٹی اقدامات کے احکامات جاری کر دیے ہیں۔
اے ایف پی کو موصول ہونے والی فرانس کی کورٹ آف آڈیٹرز کی ایک رپورٹ کے مطابق، جو 2019 سے 2024 تک کی مدت کا احاطہ کرتی ہے، لوور میں سیکیورٹی اپ گریڈز میں "مسلسل تاخیر” کی نشاندہی کی گئی ہے۔ رپورٹ کے مطابق میوزیم کے صرف ایک حصے کے چوتھائی حصے میں ہی ویڈیو نگرانی موجود ہے۔
چور اتوار کی صبح تقریباً 9:30 بجے (پاکستانی وقت 12:30 بجے دوپہر) پہنچے، یعنی میوزیم کھلنے کے آدھے گھنٹے بعد۔
انہوں نے ایک ٹرک پارک کیا جس میں فرنیچر منتقل کرنے جیسی ایک لمبی سیڑھی لگی تھی، اور اسی کے ذریعے اپالو گیلری کے نیچے کھڑکی تک پہنچے، کٹنگ ٹولز سے شیشہ کاٹ کر اندر داخل ہوئے اور شو کیسز کھول لیے۔
دنیا کے مشہور ترین میوزیم، جس میں مونا لیزا سمیت ہزاروں نادر فن پارے شامل ہیں، بدھ سے پہلے دوبارہ نہ کھلنے کا امکان ہے کیونکہ یہ عام طور پر منگل کو بند رہتا ہے۔
پیر کے روز سیاحوں کی لمبی قطاریں میوزیم کے شیشے کے اہرام نما داخلی حصے تک پھیلی ہوئی تھیں، سب امید لگائے کھڑے تھے کہ شاید اندر جانے دیا جائے۔
38 سالہ امریکی سیاح جیسلن اہلرز نے کہا،
"ہم مایوس ہیں، ہم نے اس کے لیے کافی عرصے سے منصوبہ بنایا ہوا تھا۔”
ایک اور امریکی سیاح کیرول فُکس نے کہا،
"کمال کی دیدہ دلیری ہے، کھڑکی سے اندر گھس آئے۔ کیا وہ پکڑے جائیں گے؟ مجھے شک ہے، لگتا ہے سب کچھ ہاتھ سے جا چکا ہے۔”
ہیروں اور نیلموں کے زیورات غائب
چہرے ڈھانپے ہوئے چوروں نے بھاگتے ہوئے ایمپریس یوجینی کا تاج گرا دیا اور نقصان پہنچایا۔ لوور کی ویب سائٹ کے مطابق، یہ تاج 1,354 ہیروں اور 56 زمردوں سے مزین تھا۔
تاہم وزارتِ ثقافت کے مطابق آٹھ قیمتی زیورات چرا لیے گئے۔
چوری شدہ اشیاء میں وہ زمرد اور ہیرے کا ہار بھی شامل تھا جو نپولین اوّل نے اپنی اہلیہ ایمپریس میری لوئس کو دیا تھا۔
اسی طرح ایمپریس یوجینی کا ڈائڈم بھی چوری ہوا، جس میں تقریباً دو ہزار ہیرے جڑے ہوئے تھے، اور ایک ہار بھی لے جایا گیا جو فرانس کی آخری ملکہ میری امیلیا کی ملکیت تھا، جس پر آٹھ نیلم اور 631 ہیرے جڑے ہیں۔
نیلام گھر دروو کے صدر الیگزاندر گیکویلو کے مطابق، یہ زیورات اپنی موجودہ حالت میں فروخت نہیں کیے جا سکتے۔
اس واردات میں تقریباً دو ہزار افراد کو میوزیم سے نکال دیا گیا۔ وزیر داخلہ نونیئز کے مطابق، چوری ممکنہ طور پر کسی ماہر بین الاقوامی گروہ نے کی۔
وزارتِ ثقافت کے مطابق، میوزیم کے عملے کی بروقت مداخلت سے چور بھاگنے پر مجبور ہوئے اور کچھ اوزار پیچھے چھوڑ گئے۔
یہ لوور سے 1998 کے بعد پہلی چوری ہے — اُس وقت مشہور مصور کیمیل کوروت کی ایک پینٹنگ چوری ہوئی تھی جو آج تک برآمد نہیں ہو سکی۔
فرانسیسی عجائب گھروں کو پہلے بھی ناقص سیکیورٹی کے باعث تنقید کا سامنا رہا ہے، کیونکہ بہت سے ماہرین کے مطابق یہ بینکوں کی نسبت کم محفوظ ہیں اور اب چوروں کا نشانہ بنتے جا رہے ہیں۔
گزشتہ ماہ مجرموں نے پیرس کے نیچرل ہسٹری میوزیم میں گھس کر سونے کے نمونے چرا لیے جن کی مالیت 7 لاکھ ڈالر تھی۔
اسی مہینے وسطی شہر لیموج کے میوزیم سے دو برتن اور ایک قیمتی گلدان چرا لیا گیا، جن کا تخمینہ 76 لاکھ ڈالر لگایا گیا ہے۔