اسلام آباد: پاکستان تحریک انصاف (پی ٹی آئی) کی رکنیت معطل ہونے پر شیر افضل مروت نے اپنے ردعمل کا اظہار کیا ہے۔ شیر افضل مروت نے اپنے بیان میں کہا کہ ان کی پارٹی رکنیت معطل ہونے سے کوئی فرق نہیں پڑے گا، کیونکہ وہ بانی کے ساتھ ہیں اور پارٹی رکنیت کے خاتمے سے ان کے عزم میں کوئی کمی نہیں آئے گی۔
شیر افضل مروت نے کہا کہ پارٹی میں اختلافات معمول کا عمل ہیں اور سپریم کورٹ کا فیصلہ امید کی کرن ہے۔ انہوں نے مزید کہا کہ قانون کی حکمرانی کا راستہ بحال ہوتا نظر آرہا ہے۔ مروت نے یہ بھی کہا کہ اگر کسی پی ٹی آئی رہنما نے ان کے خلاف سازش کی ہے تو انہیں اس کی پروا نہیں۔
واضح رہے کہ پی ٹی آئی نے شیر افضل مروت کی بنیادی رکنیت معطل کر دی ہے۔ پی ٹی آئی کے اعلامیے کے مطابق، شیر افضل مروت کے خلاف ایک انکوائری کمیٹی تشکیل دی گئی ہے جو کہ پارٹی ڈسپلن کی خلاف ورزی سے متعلق انکوائری کر کے رپورٹ بانی پی ٹی آئی کو پیش کرے گی ، انکوائری کمیٹی میں مصدق ملک، بریگیڈیئر ریٹائرڈ فردوس شمیم نقوی، داؤد خان کاکڑ اور رؤف حسن شامل ہیں۔
