پاکستان میں منکی پاکس کے مشتبہ کیس کا انکشاف، ہائی الرٹ
اسلام آباد: وزارت قومی صحت نے پاکستان میں منکی پاکس (ایم پاکس) کے ایک مشتبہ کیس کا انکشاف کیا ہے۔
وزارت صحت کے ترجمان کی جانب سے جاری بیان کے مطابق خیبرپختونخوا کے ایک شہری، جو حال ہی میں خلیجی ممالک سے واپس آیا تھا، میں ایم پاکس کی علامات ظاہر ہوئیں، جس پر اُس کے نمونے ٹیسٹ کے لیے لیبارٹری بھیج دیے گئے ہیں۔
وزارت کے حکام نے بتایا کہ متاثرہ شخص میں بیماری کی علامات معمولی نوعیت کی ہیں، جبکہ اُس کے رابطے میں آنے والے افراد کی تلاش شروع کردی گئی ہے تاکہ ان کے نمونے بھی حاصل کیے جاسکیں۔
ترجمان وزارت صحت نے بتایا کہ تمام صوبوں کو ایم پاکس کے حوالے سے فوکل پرسنز مقرر کرنے کی ہدایت جاری کردی گئی ہے، جبکہ بارڈر ہیلتھ سروسز کو ملک کے تمام داخلے کے مقامات پر سخت نگرانی کرنے کا کہا گیا ہے۔
یہ بات قابل ذکر ہے کہ عالمی ادارہ صحت (WHO) نے کانگو اور افریقہ کے دیگر علاقوں میں ایم پاکس کی نئی قسم کے پھیلاؤ کو عالمی ہنگامی صورتحال قرار دیا ہے۔ افریقہ کے کئی ممالک میں بچوں اور بڑوں میں ایم پاکس کے کیسز کی تصدیق ہوئی ہے۔
اب تک 13 ممالک میں ایم پاکس کے کیسز رپورٹ ہوچکے ہیں جبکہ 517 افراد کی موت کی اطلاع ہے۔ رواں سال سب سے زیادہ مشتبہ کیسز افریقی ممالک میں رپورٹ ہوئے ہیں، جہاں 17 ہزار سے زائد افراد متاثر ہوئے ہیں۔
