مکسڈ مارشل آرٹس غیر اسلامی، طالبان نے پابندی عائد کر دی
طالبان حکومت کی اسپورٹس اتھارٹی نے مکسڈ مارشل آرٹس (MMA) کو پرتشدد اور غیر اسلامی قرار دیتے ہوئے اس پر پابندی عائد کر دی ہے۔ عالمی خبر رساں ادارے اے ایف پی کے مطابق، طالبان حکومت نے یہ فیصلہ وزارتِ امر بالمعروف و نہی عن المنکر کی تحقیق کے بعد کیا جس میں مکسڈ مارشل آرٹس کو اسلامی قانون یا شریعت کے مخالف پایا گیا۔
طالبان اسپورٹس اتھارٹی کی جانب سے جاری کردہ بیان میں کہا گیا کہ یہ کھیل اسلامی تعلیمات کے منافی ہے اور شریعت کے بہت سے پہلوؤں سے متصادم ہے۔ بیان میں مزید کہا گیا کہ مکسڈ مارشل آرٹس ایک بے حد پرتشدد کھیل ہے جس میں کھلاڑیوں کو شدید چوٹیں لگنے یا موت کا خطرہ رہتا ہے، اور کھلاڑیوں کی زندگی کا تحفظ ضروری ہے۔
طالبان حکومت نے اس فیصلے کو اسلامی اصولوں کے مطابق قرار دیا ہے اور کہا ہے کہ اس طرح کے کھیلوں پر پابندی لگا کر وہ اپنے معاشرے کو مزید اسلامی اور محفوظ بنانے کی کوشش کر رہے ہیں۔ اس فیصلے کے بعد مکسڈ مارشل آرٹس کے کھلاڑی اور شائقین میں مایوسی پھیل گئی ہے، اور اس کھیل کے مستقبل پر سوالات اٹھنے لگے ہیں۔
