بنگلادیشی بلے باز شکیب الحسن کے ہیلمٹ کا پٹا چبانے کی وجہ سامنے آگئی
نئی دہلی: بنگلادیش کے تجربہ کار کرکٹر شکیب الحسن کے ایک منفرد انداز نے کرکٹ کے شائقین اور کمنٹیٹرز کی توجہ اپنی جانب مبذول کر لی ہے۔ بھارت کے خلاف ٹیسٹ میچ میں جب شکیب الحسن بیٹنگ کر رہے تھے، تو انھیں اکثر اپنے ہیلمٹ کا پٹا منہ میں دبائے ہوئے دیکھا گیا۔ یہ غیر معمولی حرکت نہ صرف میدان میں موجود کھلاڑیوں بلکہ کرکٹ کے ماہرین اور شائقین کے لیے بھی ایک دلچسپ موضوع بن گئی۔
شکیب الحسن کی اس عجیب عادت پر مختلف تبصرے سامنے آئے۔ کچھ سوشل میڈیا صارفین نے مذاقاً کہا کہ شاید شکیب کو بھوک لگی ہے یا وہ ہیلمٹ کے پٹے کا ذائقہ پسند کرتے ہیں۔ ایک صارف نے ہنستے ہوئے لکھا، فلیور کون سا ہے؟ تو کسی نے کہا کہ شاید وہ بولر کو "کچا چبا جانے” کی دھمکی دے رہے ہیں۔
شکیب الحسن کی اس عادت کی اصل وجہ سامنے لانے والے بنگلہ دیش کے سابق کپتان اور شکیب کے ساتھی تمیم اقبال ہیں۔ تمیم کے مطابق، شکیب یہ حرکت اس لیے کرتے ہیں تاکہ وہ اپنے سر کو بیٹنگ کے وقت سیدھا رکھ سکیں اور اس طرح گیند کو بہتر طریقے سے دیکھ سکیں۔
کرکٹ ماہرین نے بھی اس تکنیک کو سراہا اور کہا کہ بائیں ہاتھ سے کھیلنے والے کھلاڑیوں کے لیے یہ ایک منفرد طریقہ ہے جس سے وہ اپنی بیٹنگ تکنیک کو بہتر بنا سکتے ہیں۔ ماہرین کے مطابق، یہ پریکٹس کھلاڑیوں کو اپنے سر کو غیر ضروری طور پر جھکنے سے بچانے میں مدد دیتی ہے، جس سے ان کی تکنیک میں بہتری آتی ہے۔
کرکٹ کی دنیا میں یہ پہلی بار نہیں ہے کہ شکیب الحسن کو اس طرح کی حرکات کرتے ہوئے دیکھا گیا ہے۔ کچھ عرصہ قبل گلوبل ٹی ٹوئنٹی کینیڈا کے دوران بھی شکیب کو اپنے دانتوں سے جرسی کاٹتے ہوئے دیکھا گیا تھا۔
کچھ ماہرین کا کہنا ہے کہ بلے باز اکثر دباؤ کے دوران اس طرح کے نفسیاتی حربے اپناتے ہیں۔ کسی کھلاڑی کا ناخن چبانا، جرسی یا ہیلمٹ کے پٹے کو دانتوں میں دبانا دراصل ان کے ذہنی دباؤ کو کم کرنے کا ایک طریقہ ہوتا ہے، جس سے کھلاڑی میدان میں اپنی توجہ مرکوز رکھنے اور دباؤ کو کنٹرول کرنے کی کوشش کرتا ہے۔
شکیب الحسن کو حالیہ دنوں میں بینائی کے مسائل کا سامنا بھی رہا ہے۔ ان کی آنکھوں کی بینائی میں کچھ خرابی آئی تھی، جس کی وجہ سے انھیں لندن میں ایک ماہر امراض چشم سے بھی مشورہ کرنا پڑا تھا۔ ممکن ہے کہ ان کے یہ مسائل بھی اس حرکت کی وجہ ہوں، کیونکہ ایک اچھے بلے باز کے لیے گیند پر مکمل توجہ مرکوز رکھنا بہت ضروری ہوتا ہے۔
شکیب الحسن کرکٹ کی دنیا میں ایک منفرد مقام رکھتے ہیں۔ وہ نہ صرف اپنی بیٹنگ اور بولنگ سے بلکہ اپنی جارحانہ اور ذہنی طاقت سے بھی پہچانے جاتے ہیں۔ ان کا یہ انداز بھی شاید ان کے منفرد کھیل کا حصہ ہو جو انھیں دوسرے کھلاڑیوں سے الگ بناتا ہے۔
