پاکستان کے شوٹر جی ایم بشیر نے ایشین گیمز 2026 کے شوٹنگ مقابلوں میں شاندار کارکردگی کا مظاہرہ کرتے ہوئے 25 میٹر ریپڈ فائر پسٹل ایونٹ میں کانسی کا تمغہ اپنے نام کرلیا۔
جی ایم بشیر کوالیفائنگ راؤنڈ کے پہلے روز آٹھویں پوزیشن پر تھے، تاہم دوسرے روز انہوں نے بہتر کارکردگی کا مظاہرہ کرتے ہوئے چھٹی پوزیشن حاصل کی اور میڈل راؤنڈ کے لیے کوالیفائی کیا۔
میڈل راؤنڈ میں بھی جی ایم بشیر نے عمدہ کارکردگی کا سلسلہ جاری رکھا اور مجموعی طور پر 22 پوائنٹس حاصل کرکے تیسری پوزیشن حاصل کی، جس کے نتیجے میں وہ کانسی کے تمغے کے حقدار قرار پائے۔
جی ایم بشیر کے کانسی کے تمغے کے بعد ایشین گیمز 2026 میں پاکستان کے مجموعی تمغوں کی تعداد 6 ہوگئی ہے۔
واضح رہے کہ تین مرتبہ اولمپکس میں پاکستان کی نمائندگی کرنے والے جی ایم بشیر اس سے قبل 2022 میں پاکستان کے لیے ورلڈ چیمپئن شپ کا کانسی کا تمغہ بھی جیت چکے ہیں۔
