تاریخی موقع اسرائیل کے ہاتھ لگا ہے، ایران پر فوری حملہ کیا جائے: سابق وزیراعظم
تل ابیب: اسرائیل کے سابق وزیر اعظم نفتالی بینیٹ نے اپنی حکومت سے مطالبہ کیا ہے کہ یہ تاریخی موقع ہے، ایران پر فوری حملہ کیا جانا چاہیے۔
نفتالی بینیٹ نے اپنے بیان میں کہا کہ پچھلے 50 سالوں میں ہمیں ایران کے خلاف اس نوعیت کا کبھی موقع نہیں ملا۔ یہ وقت ہے کہ ہم مشرق وسطیٰ کا نقشہ اپنے حق میں تبدیل کریں۔ انہوں نے ایران کی قیادت کو شطرنج کا بہترین کھلاڑی قرار دیا لیکن یہ بھی کہا کہ دشمن نے پہلی بار براہ راست حملہ کر کے سنگین غلطی کی ہے، جس کا بھرپور جواب دینا چاہیے اور ایران کے جوہری مراکز کو مکمل تباہ کر دینا چاہیے۔
سابق وزیر اعظم نے مزید کہا کہ ایرانی حملہ دہشت گردی کی واضح مثال ہے اور اس ناسور کو ختم کرنا ضروری ہے۔ انہوں نے کہا کہ تاریخ آج ہمیں نادر موقع فراہم کر رہی ہے اور ہمیں اس موقع کا بھرپور فائدہ اٹھانا چاہیے۔
یہ بھی قابل ذکر ہے کہ گزشتہ رات ایران نے اسرائیل پر 200 بیلسٹک میزائل داغے تھے، لیکن اسرائیلی میڈیا کے مطابق اسرائیلی دفاعی نظام نے تمام میزائلوں کو ناکام بنا دیا تھا۔
دوسری جانب، ایران کے پاسداران انقلاب گارڈ نے کہا ہے کہ ان میزائلوں سے اسرائیل کے اہم فوجی اور سیکیورٹی مراکز کو نشانہ بنایا گیا تھا۔ ایران نے اس حملے کو اسماعیل ہنیہ اور حسن نصراللہ کی شہادت کا بدلہ قرار دیا ہے۔
