تازہ ترین رپورٹس کے مطابق مائیکرو سافٹ نے اسکائپ کو مئی 2025 سے مستقل طور پر بند کرنے کا فیصلہ کر لیا ہے۔ اسکائپ کو 2003 میں متعارف کرایا گیا تھا اور 2011 میں مائیکرو سافٹ نے اسے خرید لیا تھا۔ یہ سروس انٹرنیٹ پر آڈیو اور ویڈیو کالنگ کے اولین پلیٹ فارمز میں شامل تھی۔
ایکس ڈی اے کی رپورٹ کے مطابق، مائیکرو سافٹ نے ونڈوز کے تازہ ترین اسکائپ ورژن کے پریویو میں ایک پیغام شامل کیا ہے جس میں واضح کیا گیا ہے کہ اسکائپ مئی 2025 سے بند کر دی جائے گی۔ رپورٹ کے مطابق اسکائپ صارفین کو بہت جلد پیغام دیا جائے گا کہ وہ اپنی چیٹس اور کالز ٹیمز پر منتقل کر لیں۔ مائیکرو سافٹ نے 2017 میں "ٹیمز” متعارف کرایا جو کہ مختلف کمپنیوں اور اداروں میں مقبول ہو چکا ہے۔ ٹیمز کی بڑھتی ہوئی مقبولیت کے باعث کئی سالوں سے اسکائپ کی بندش سے متعلق قیاس آرائیاں کی جا رہی تھیں۔
