اسلام آباد (ایم وائے کے نیوز) – سپریم کورٹ نے مخصوص نشستوں سے متعلق کیس میں سنی اتحاد کونسل کی متفرق درخواستوں پر فیصلہ سنا دیا ہے۔ عدالت نے مخصوص نشستوں کے اہم کیس کی لائیو سٹریمنگ کی اجازت دیتے ہوئے بنچ کی تشکیل پر اعتراضات سمیت تمام متفرق درخواستیں مسترد کر دیں۔
سپریم کورٹ کی جانب سے جاری کیے گئے مختصر فیصلے کے مطابق مخصوص نشستوں کی سماعت 26ویں آئینی ترمیم کی درخواستوں کے فیصلے کے بعد کرنے کی استدعا کو بھی مسترد کر دیا گیا ہے۔ عدالت نے واضح کیا کہ اس معاملے پر مزید تاخیر نہیں کی جا سکتی۔ فیصلے میں سپریم کورٹ کے آئی ٹی ڈیپارٹمنٹ کو حکم دیا گیا ہے کہ مخصوص نشستوں سے متعلق کیس کی آئندہ سماعت کی لائیو سٹریمنگ کے لیے ضروری انتظامات کیے جائیں۔ عدالت کا کہنا ہے کہ تفصیلی فیصلہ بعد میں جاری کیا جائے گا۔
قانونی ماہرین کے مطابق اس فیصلے سے نہ صرف شفافیت کو فروغ ملے گا بلکہ یہ تاریخی اہمیت کا حامل بھی ہے کیونکہ عوام براہِ راست عدالت کی کارروائی کو دیکھ سکیں گے۔ مخصوص نشستوں کا معاملہ قومی سیاست میں مرکز نگاہ بنا ہوا ہے اور اس کیس کے فیصلے کے ممکنہ اثرات دور رس ہوں گے۔
