راولپنڈی: نالہ لئی میں پانی کی سطح بلند، اطراف میں خطرے کے سائرن بجا دیے گئے
راولپنڈی کے علاقے کٹاریاں کے مقام پر نالہ لئی میں پانی کی سطح 22 فٹ سے تجاوز کرگئی، جس کے بعد نالہ لئی کے اطراف خطرے کے سائرن بجا دیے گئے اور ریسکیو اداروں کو ہائی الرٹ کردیا گیا۔
نالہ لئی کے اطراف رہنے والی آبادی کو محفوظ مقامات پر منتقل ہونے کی ہدایت کی گئی ہے، جبکہ صادق آباد اور ڈھوک الٰہی بخش میں پانی گھروں میں داخل ہوگیا۔
دوسری جانب مری روڈ اور راول روڈ پر بھی بارش کا پانی جمع ہونے سے شہریوں کو مشکلات کا سامنا ہے۔ گولڑہ میں سب سے زیادہ 113 ملی میٹر بارش ریکارڈ کی گئی۔
ادھر مقبوضہ جموں اور بالائی علاقوں میں ہونے والی شدید بارشوں کے باعث شکرگڑھ کے نالہ بئیں میں بھی سیلابی صورتحال پیدا ہوگئی ہے، جس کے نتیجے میں درجن سے زائد دیہات کی فصلیں زیرِ آب آگئی ہیں۔
فلڈ فورکاسٹنگ ڈویژن لاہور کے مطابق دریائے سندھ میں کالا باغ اور گڈو بیراج کے مقامات پر نچلے درجے کا سیلاب ہے، جبکہ دیگر دریاؤں میں صورتحال معمول کے مطابق ہے۔
