پاکستان کی پہلی چاند گاڑی کا نام ’جناح-1‘ رکھ دیا گیا
اسلام آباد: پاکستان کی پہلی قمری گاڑی کا سرکاری نام سامنے آگیا۔ سپارکو نے ملک کی پہلی چاند گاڑی کا نام ’جناح-1‘ رکھنے کا اعلان کردیا۔
سپارکو کے مطابق قمری گاڑی کے نام کے لیے ملک گیر مقابلے کا انعقاد کیا گیا تھا، جس میں ملک بھر سے 4 ہزار سے زائد تجاویز موصول ہوئیں۔ ’جناح-1‘ نام 7 شرکاء کی جانب سے تجویز کیا گیا، تاہم فاتح کا انتخاب قرعہ اندازی کے ذریعے کیا گیا۔
قرعہ اندازی میں بہاول نگر سے تعلق رکھنے والے 17 سالہ طیب کریم فاتح قرار پائے، جنہوں نے ’جناح-1‘ نام تجویز کیا تھا۔
چیئرمین سپارکو کے مطابق ’جناح-1‘ کا نام قائداعظم محمد علی جناح کو خراجِ عقیدت پیش کرنے کے لیے رکھا گیا ہے۔ ان کا کہنا تھا کہ یہ نام پاکستان کے عزم، ترقی اور نئے خلائی افق کی علامت ہے۔
یاد رہے کہ پاکستان کا پہلا قمری روور 2029 میں چین کے چانگ ای-8 مشن کے ذریعے چاند پر روانہ ہوگا۔ ’جناح-1‘ چاند کے جنوبی قطب پر سائنسی تحقیق میں حصہ لے گا۔
