پی او سی ہولڈرز بھی پاکستان کے حج کوٹے پر حج کرسکیں گے
اسلام آباد: پاکستانی نژاد کارڈ (POC) کے حامل افراد کو پہلی بار پاکستان کے حج کوٹے کے تحت حج کی ادائیگی کی اجازت دے دی گئی ہے۔
ذرائع کے مطابق پاکستان کے مجموعی حج کوٹے میں سے ایک فیصد کوٹہ پی او سی ہولڈرز کے لیے مختص ہوگا۔ اس کے تحت 1,792 پاکستانی نژاد کارڈ رکھنے والے افراد پہلی مرتبہ پاکستانی کوٹے پر حج کرسکیں گے۔
ذرائع کا کہنا ہے کہ پی او سی ہولڈرز سرکاری اور نجی دونوں حج اسکیموں سے استفادہ کرسکیں گے۔
ذرائع کے مطابق سعودی عرب نے پاکستانی نژاد کارڈ رکھنے والے افراد کو پاکستان کے حج کوٹے میں شامل کرنے کی اجازت دے دی ہے۔
یہ سہولت بیرون ملک مقیم ان افراد کے لیے فراہم کی گئی ہے جنہوں نے پاکستانی شہریت اور پاسپورٹ ترک کردیا ہے، تاہم وہ پاکستانی نژاد کارڈ کے حامل ہیں۔
