کیرولین لیویٹ رواں ماہ وائٹ ہاؤس پریس سیکریٹری کا عہدہ چھوڑ دیں گی
واشنگٹن: امریکی صدر ڈونلڈ ٹرمپ نے وائٹ ہاؤس کی پریس سیکریٹری کیرولین لیویٹ کے رواں ماہ کے آخر میں عہدہ چھوڑنے کی تصدیق کردی۔
ڈونلڈ ٹرمپ نے کیرولین لیویٹ کو وائٹ ہاؤس کی بہترین پریس سیکریٹریز میں سے ایک قرار دیتے ہوئے ان کی خدمات کو سراہا۔ امریکی صدر کے مطابق لیویٹ نے 2018 سے لے کر 2024 کی انتخابی مہم سمیت انصاف اور آزادی کے لیے شاندار کام کیا۔
28 سالہ کیرولین لیویٹ امریکی تاریخ کی کم عمر ترین وائٹ ہاؤس پریس سیکریٹری ہیں۔
عہدہ چھوڑنے کے فیصلے کے حوالے سے کیرولین لیویٹ کا کہنا ہے کہ وہ اپنے چھوٹے بچوں کے ساتھ زیادہ وقت گزارنا چاہتی ہیں۔
یاد رہے کہ کیرولین لیویٹ نے رواں سال مئی میں ایک بیٹی کو جنم دیا تھا اور وہ حال ہی میں زچگی کی چھٹی سے واپس آئی تھیں۔ لیویٹ نے وائٹ ہاؤس میں اپنے کردار کو ’’زندگی بھر کا اعزاز اور مہم جوئی‘‘ قرار دیا۔
