ٹیکساس میں امریکی فوج کا اپاچی ہیلی کاپٹر تباہ، 2 اہلکار ہلاک
ٹیکساس: امریکی ریاست ٹیکساس میں امریکی فوج کا اے ایچ-64 اپاچی ہیلی کاپٹر گر کر تباہ ہوگیا، جس کے نتیجے میں 2 فوجی اہلکار ہلاک ہوگئے۔
خبر رساں ایجنسی کے مطابق فورٹ ہُڈ فوجی اڈے کی جانب سے جاری بیان میں بتایا گیا ہے کہ ہیلی کاپٹر سیلاڈو کے علاقے میں حادثے کا شکار ہوا۔
پولیس کو مقامی وقت کے مطابق تقریباً رات 1 بج کر 33 منٹ پر سیلاڈو گاؤں کے جنوب میں واقع کھیتوں میں ہیلی کاپٹر کے ملبے کی موجودگی کی اطلاع ملی۔ جائے وقوعہ پر پہنچنے والے اہلکاروں نے ملبے کے ساتھ بڑے پیمانے پر آگ بھی دیکھی۔
حکام نے حادثے میں دونوں فوجی اہلکاروں کی ہلاکت کی تصدیق کردی ہے۔
تاہم حکام کی جانب سے حادثے کے وقت ہیلی کاپٹر کی سرگرمیوں یا حادثے کی وجوہات کے بارے میں فوری طور پر مزید تفصیلات فراہم نہیں کی گئیں۔
