امریکا کا درآمدی ڈرونز پر 100 فیصد تک ٹیرف عائد کرنے کا اعلان
واشنگٹن: امریکی صدر ڈونلڈ ٹرمپ نے امریکا درآمد کیے جانے والے بغیر پائلٹ ڈرونز اور ان کے پرزہ جات پر 100 فیصد تک ٹیرف عائد کرنے کا اعلان کردیا۔
وائٹ ہاؤس کے مطابق صدر ٹرمپ نے قومی سلامتی کی بنیاد پر درآمدی ڈرونز پر نئے ٹیرف عائد کرنے کا فیصلہ کیا ہے۔ بعض بغیر پائلٹ ڈرون سسٹمز، جن کا وزن 25 کلوگرام سے زیادہ ہے اور جن میں تھرمل امیجرز اور ڈاکنگ اسٹیشنز جیسی صلاحیتیں موجود ہیں، ان کی درآمد پر 100 فیصد ڈیوٹی عائد کی جائے گی۔
بیان کے مطابق چھوٹے ڈرونز پر 25 فیصد ٹیرف لاگو ہوگا، جبکہ زیادہ تر نئے ٹیرف 3 ستمبر سے نافذ العمل ہوں گے۔
وائٹ ہاؤس کا کہنا ہے کہ نئے ٹیرف کا مقصد امریکا میں ڈرونز اور ان کے پرزہ جات کی مقامی پیداوار کو فروغ دینا اور غیر ملکی سپلائی چینز پر انحصار کم کرنا ہے۔
واضح رہے کہ گزشتہ ہفتے چین نے بھی امریکا کو ڈرونز کی برآمدات پر پابندیاں عائد کرنے کا اعلان کیا تھا۔ چین نے واشنگٹن کی جانب سے جبری مشقت اور قومی سلامتی کے خدشات کے تحت عائد تجارتی پابندیوں کے جواب میں 6 کمپنیوں کو بلیک لسٹ بھی کیا تھا۔
یہ اقدام امریکا کی جانب سے چین سمیت 59 دیگر ممالک پر نئے ٹیرف عائد کیے جانے کے چند روز بعد سامنے آیا ہے۔
