لاہور: ہربنس پورہ میں مبینہ زہریلا کھانا کھانے سے بہن بھائی جاں بحق، والدین زیرِ علاج
لاہور کے علاقے ہربنس پورہ میں مبینہ زہریلا کھانا کھانے سے ایک ہی خاندان کے چار افراد کی حالت بگڑ گئی، جن میں سے بہن بھائی جان کی بازی ہار گئے۔
پولیس کے مطابق جاں بحق ہونے والوں میں 16 سالہ قدیر اور اس کی 14 سالہ بہن اسماء شامل ہیں، جبکہ ان کے والدین حنیف اور کلثوم بی بی سروسز ہسپتال میں زیرِ علاج ہیں۔
پولیس کا کہنا ہے کہ متاثرہ خاندان نے گزشتہ رات آلو گوبھی اور چاول کھائے تھے۔ طبیعت خراب ہونے پر متاثرین کو پہلے فوجی فاؤنڈیشن ہسپتال منتقل کیا گیا، بعد ازاں انہیں سروسز ہسپتال منتقل کردیا گیا۔
پولیس کے مطابق کھانے کے نمونے حاصل کرلیے گئے ہیں، جبکہ فرانزک ٹیموں کی مدد سے واقعے کی تحقیقات جاری ہیں۔
