خاتون کو ہراساں کرنے کے لیے گھر میں گھسنے والے شخص کا خوف کے مارے پیشاب نکل گیا۔

سنگاپور میں ایک بھارتی شہری کو ہمسایہ خاتون کے گھر میں زبردستی گھس کر ہراساں کرنے کے جرم میں سات ماہ قید کی سزا سنائی گئی ہے۔ عدالتی کارروائی کے دوران انکشاف ہوا کہ 26 سالہ ایراکودن ابین راج نے 22 ستمبر کو علی الصبح اپنے ہمسایہ خاتون کے فلیٹ میں بالکونی کے ذریعے داخل ہو کر انہیں ہراساں کیا۔ متاثرہ 36 سالہ خاتون اپنے شوہر کے ساتھ بیڈروم میں سو رہی تھیں، جبکہ ان کی بیٹی دوسرے کمرے میں تھی۔

 ملزم خاتون کے کمرے میں جا پہنچا اور ان کے زیرِ جامہ کو چھونے لگا۔ خاتون نے کسی کے ہاتھ لگنے کا احساس کیا تو وہ جاگ گئیں اور حیرت زدہ ہو کر دیکھا کہ ان کے شوہر کے علاوہ کمرے میں ایک اور شخص کھڑا تھا۔ ملزم نے اپنے موبائل فون کی ٹارچ آن کر رکھی تھی، جس سے اس کی شناخت ممکن ہوئی۔خاتون کے چیخنے پر ان کا شوہر بھی جاگ گیا اور ملزم سے سامنا کرنے کے بعد اسے فوراً کمرے سے نکلنے کا حکم دیا۔ تاہم، ملزم اتنا خوفزدہ ہوگیا کہ وہیں پیشاب کر بیٹھا اور شوہر کے سامنے منت سماجت کرنے لگا کہ پولیس کو نہ بلایا جائے۔ تاہم، متاثرہ خاتون نے فوری طور پر پولیس کو اطلاع دے دی، اور پولیس کے پہنچنے تک ملزم موقع پر ہی موجود رہا۔

دورانِ تفتیش، ابین راج نے گھر میں زبردستی گھسنے کا اعتراف کر لیا لیکن یہ دعویٰ کیا کہ اس نے خاتون کو نہیں چھوا بلکہ اس کا فون غلطی سے متاثرہ پر گر گیا تھا۔ استغاثہ نے عدالت میں مؤقف اپنایا کہ ملزم نے خاتون کے گھر میں داخل ہو کر ان کی رازداری پامال کی اور ان کے لیے شدید ذہنی دباؤ پیدا کیا۔

ملزم کے وکیل نے دفاع کرتے ہوئے کہا کہ ان کا مؤکل ایک غریب خاندان سے تعلق رکھتا ہے اور ذہنی دباؤ میں تھا، تاہم استغاثہ نے انسٹی ٹیوٹ آف مینٹل ہیلتھ کی رپورٹ کا حوالہ دیا، جس میں واضح کیا گیا کہ ابین راج کو کسی ذہنی بیماری کی تشخیص نہیں ہوئی۔عدالت نے ملزم کو سات ماہ قید کی سزا سنا دی، جبکہ قانون کے مطابق اس جرم میں تین سال تک قید، جرمانہ یا کوڑوں کی سزا بھی دی جا سکتی تھی۔