پنجاب پولیس نے محرم الحرام کے دوران فرقہ وارانہ ہم آہنگی کو برقرار رکھنے اور امن و امان کے قیام کو یقینی بنانے کے لیے سوشل میڈیا پر قابل اعتراض اور اشتعال انگیز مواد کی تشہیر کرنے والوں کے خلاف کریک ڈاؤن شروع کر دیا ہے، جس کے تحت صرف گزشتہ 24 گھنٹوں میں 18 افراد کو گرفتار کر لیا گیا اور 19 مقدمات درج کیے گئے۔
ایم وائے کے نیوز ٹی وی کے مطابق ترجمان پنجاب پولیس نے بتایا کہ گزشتہ روز کے دوران سوشل میڈیا پر اشتعال انگیز مواد اپ لوڈ کرنے کے 25 واقعات رپورٹ ہوئے۔ ان میں سے 16 واقعات فیس بک پر، 3 واٹس ایپ پر اور 6 دیگر پلیٹ فارمز پر پیش آئے۔ ان میں سے 19 کیسز پر فوری مقدمات درج کرتے ہوئے 18 افراد کو قانون کی گرفت میں لے لیا گیا ہے۔ ترجمان کا مزید کہنا تھا کہ گزشتہ 7 روز کے دوران مجموعی طور پر 130 مقدمات درج کیے جا چکے ہیں جبکہ 148 افراد کو اشتعال انگیزی، نفرت انگیز تقاریر اور فرقہ وارانہ مواد کی بنیاد پر گرفتار کیا گیا ہے۔
آئی جی پنجاب نے اس ضمن میں واضح ہدایات جاری کرتے ہوئے کہا ہے کہ سوشل میڈیا پر نفرت، اشتعال اور فرقہ واریت پھیلانے والے کسی رعایت کے مستحق نہیں ہیں۔ ایسے عناصر کے خلاف زیرو ٹالرنس کی پالیسی اپنائی گئی ہے اور انہیں قانون کے شکنجے میں لایا جا رہا ہے۔ انہوں نے کہا کہ محرم الحرام کے دوران مذہبی ہم آہنگی اور سماجی امن کو ہر قیمت پر یقینی بنایا جائے گا۔ کسی کو بھی فرقہ واریت، نفرت انگیزی یا اشتعال دلانے کی اجازت نہیں دی جائے گی۔
