مصطفیٰ عامر کے فلمی انداز میں قتل کا انکشاف، قاتل کا لرزہ خیز بیان سامنے آگیا

کراچی: مصطفیٰ عامر قتل کیس میں مرکزی ملزم ارمغان نے لرزہ خیز تفصیلات بیان کر دیں، جس میں اس نے مصطفیٰ کو فلمی انداز میں قتل کرنے کا اعتراف کر لیا۔ تحقیقات کے دوران مرکزی ملزم ارمغان نے انکشاف کیا کہ جب مصطفیٰ اس کے گھر میں داخل ہوا، تو اس پر لوہے کی راڈ سے حملہ کیا گیا۔ مصطفیٰ کے زخمی ہونے کے بعد ارمغان نے ایک خوفناک کھیل کھیلا۔

ملزم نے بتایا کہ اس نے مصطفیٰ سے کہا "اب میں ٹاس کروں گا، اگر ہیڈ آیا تو چھوڑ دوں گا، ٹیل آیا تو مزید ماروں گا۔” یہ کہہ کر ارمغان نے دو بار سکے کا ٹاس کیا اور ہر بار ٹیل آنے پر مصطفیٰ پر مزید وار کیے۔ تحقیقاتی ذرائع کے مطابق، ارمغان نے بعد میں مصطفیٰ کی لاش حب لے جا کر گاڑی کی ڈگی میں رکھی اور اسے آگ لگانے سے پہلے پھر سے ٹاس کیا۔ ملزم نے کہا: "اگر ٹاس ہارا تو جلاؤں گا، جیتا تو نہیں جلاؤں گا۔” آخر میں پیٹرول ڈال کر لاش کو آگ لگا دی گئی۔ تحقیقاتی ٹیم کے مطابق، مصطفیٰ کی جلائی گئی لاش کو تلاش کرنے کے لیے 130 کلومیٹر اندر جا کر تحقیقات کرنا پڑیں۔