شوہر لڑکیوں کے چکر میں نہ پڑیں اس لئے دوسری شادی کی اجازت دی، سلمی ظفر

لاہور: پاکستانی اداکارہ سلمیٰ ظفر عاصم نے ایک اہم انکشاف کرتے ہوئے بتایا کہ انہوں نے اپنے شوہر عاصم کو دوسری لڑکیوں کے ساتھ افیئرز رکھنے کے بجائے دوسری شادی کی اجازت خود دی تھی۔
حال ہی میں ایک نجی پوڈکاسٹ میں شریک ہونے والی سلمیٰ ظفر عاصم نے اپنی نجی اور پیشہ ورانہ زندگی کے کئی اہم راز شیئر کیے۔
اداکارہ نے اپنی شادی کے حوالے سے تفصیلات بیان کرتے ہوئے کہا کہ ان کی شادی 18 سال سے بھی پہلے ہوئی تھی۔ انہوں نے بتایا کہ ان کے انٹر کے امتحان کا نتیجہ اور شناختی کارڈ بھی شادی کے بعد تیار ہوا۔ شوہر اور ان میں پانچ سال کا فرق ہے اور ان کے دو بیٹے اور ایک بیٹی ہے۔ سلمیٰ نے اپنی ساس کی اہمیت پر بات کرتے ہوئے کہا کہ ان کی ساس ہی وہ شخصیت ہے جس نے انہیں زندگی کی حقیقتیں سکھائیں، اور وہ جو کچھ بھی ہیں ساس کی رہنمائی کی بدولت ہیں۔
شوہر کی دوسری شادی کے بارے میں سوالات کا جواب دیتے ہوئے سلمیٰ ظفر نے کہا کہ جب ان تک عاصم کی دوستیوں کا پتہ چلا، تو ابتدائی تین ماہ کافی مشکل گزرے۔ انہوں نے مزید کہا کہ ان کی بھوک اور پیاس ختم ہوگئی، لیکن اس کے بعد انہوں نے اپنے سسر سے مشاورت کی اور پھر شوہر کو دوسری شادی کی اجازت دے دی۔
اداکارہ نے کہا کہ انہوں نے خود عاصم کو کہا کہ وہ دوسری لڑکیوں کے ساتھ دوستی کرنے کے بجائے نکاح کر لے۔ اس بات پر بچوں کو منانا بھی ان کے لیے ضروری تھا۔ ایک حادثے کے بعد، سلمیٰ نے بچوں سے کہا کہ اگر وہ اپنے والد کو قبر کی بجائے زندہ دیکھنا چاہتے ہیں تو انہیں راضی ہو کر ان کے والد کی دوسری شادی کو قبول کرنا ہوگا۔ اس پر ان کے بیٹے نے کہا کہ اگر وہ عاصم کی شادی کے بعد نہ روتے تو وہ تیار تھے۔
سلمیٰ ظفر نے اپنی بات کو آگے بڑھاتے ہوئے کہا کہ ان کی نظر میں سوتیلے بیٹے بھی ان کے اپنے بیٹے کی طرح ہیں، اور آج ان کے پاس تین نہیں، چار اولادیں ہیں، جو آپس میں حقیقی بہن بھائیوں کی طرح محبت کرتی ہیں۔