tلاہور (ایم وائے کے نیوز ٹی وی) — پاکستان کے مشہور یوٹیوبر اور وی لاگر معاذ صفدر نے اپنے حالیہ وی لاگ میں ایک جذباتی انکشاف کرتے ہوئے بتایا ہے کہ اُن کے والد نے فیصلہ کیا ہے کہ وہ اور ان کے شادی شدہ بھائی اپنے والدین کے گھر سے الگ ہو جائیں۔ یہ فیصلہ نہ صرف اُن کے لیے بلکہ ان کے مداحوں کے لیے بھی غیر متوقع اور جذباتی لمحہ ثابت ہوا۔
معاذ صفدر، جو اپنی خاندانی زندگی کے مثبت پہلوؤں اور مزاحیہ انداز کے وی لاگز کے لیے جانے جاتے ہیں، اس بار اپنی آنکھوں میں نمی اور دل گرفتہ لہجے کے ساتھ اپنے وی لاگ میں بولے کہ "آج تک جو کچھ بھی کیا، ان کے لیے ہی کیا۔” انہوں نے بتایا کہ ان کے والد نے تینوں بھائیوں کے درمیان گھر کی تقسیم کا فیصلہ کیا ہے، جس کے مطابق معاذ اور ان کے بڑے بھائی، دونوں شادی شدہ اور بچوں والے، اب الگ گھروں میں منتقل ہو جائیں گے، جبکہ سب سے چھوٹا بھائی والدین اور بہنوں کے ساتھ اسی پرانے گھر میں رہے گا۔
وی لاگ کے دوران معاذ نے اپنے والد کی گفتگو کا ایک کلپ بھی شامل کیا جس میں اُن کے والد نے نہایت بردباری سے وضاحت کی کہ یہ فیصلہ کسی ناراضگی یا سختی کا نتیجہ نہیں بلکہ ایک دور اندیش قدم ہے۔ ان کا کہنا تھا:
"جب شادی کے بعد بچوں کا سلسلہ شروع ہوتا ہے تو اصل مسئلے تب جنم لیتے ہیں۔ الگ ہونے کا یہ وقت سب سے بہتر ہے تاکہ تعلقات میں محبت قائم رہے اور دل میں کوئی کدورت نہ آئے۔”
