راولپنڈی(ویب ڈیسک) پاک افغان سرحد پر سرحد پار سے فائرنگ کے نتیجے میں 3 پاکستانی فوجی شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق واقعہ شمالی وزیرستان کے علاقے دیواگر میں پیش آیا جس میں دہشت گردوں نے پاک فوج کے جوانوں کو نشانہ بنایا۔ دہشت گردوں کے بھاری جانی نقصان کی مصدقہ اطلاعات ہیں۔ فائرنگ کے تبادلے میں پاک فوج کے 3 جوان بہادری سے لڑتے ہوئے شہید ہوگئے۔ شہید ہونے والوں میں حوالدار تیمور، نائیک شعیب اور سپاہی ثاقب نواز شامل ہیں۔
آئی ایس پی آر کے مطابق پاکستان نے دہشت گردوں کی جانب سے افغان سرزمین کے استعمال کی شدید مذمت کرتے ہوئے کہا ہے کہ امید ہے کہ افغان حکومت مستقبل میں ایسی سرگرمیوں کی اجازت نہیں دے گی۔ آئی ایس پی آر کا مزید کہنا تھا کہ پاک فوج پاکستان کی سرحدوں کے دفاع کے لیے پرعزم ہے، بہادر جوانوں کی قربانیاں ہمارے عزم کو مزید مضبوط کرتی ہیں۔
