توشہ خانہ ٹو کیس، سماعت 30 دسمبر تک ملتوی
راولپنڈی: اڈیالہ جیل میں ہونے والی توشہ خانہ ٹو کیس کی سماعت بغیر کارروائی کے 30 دسمبر تک ملتوی کر دی گئی۔
توشہ خانہ ٹو کیس کی سماعت اڈیالہ جیل میں سپیشل جج سینٹرل شاہ رخ ارجمند نے کی۔ سماعت کے دوران سابق وزیر اعظم اور بانی پی ٹی آئی عمران خان کو کمرہ عدالت میں پیش کیا گیا جبکہ سابق خاتون اول بشریٰ بی بی بھی کیس کی سماعت کے لیے جیل پہنچیں۔
عدالت میں بشریٰ بی بی کے وکیل ارشد تبریز پیش ہوئے، جبکہ دیگر وکلا سلمان صفدر اور کوثین فیصل مفتی نے ذاتی مصروفیات کی بنا پر کیس کی سماعت ملتوی کرنے کی درخواست کی۔
وکلا کی عدم موجودگی کی وجہ سے پراسیکیوشن کے گواہ کا بیان قلمبند نہیں ہو سکا، جس کے باعث عدالت نے سماعت ملتوی کر دی۔
سماعت کے اختتام پر سابق خاتون اول بشریٰ بی بی اڈیالہ جیل سے روانہ ہو گئیں۔
