قومی ادارہ صحت نے بڑی بیماری سے متعلق خبر دار کر دیا

قومی ادارہ صحت (این آئی ایچ) کے مطابق  پاکستان بھر میں لوگوں کے بیمار ہونے کا سبب انفلوئنزا کی وبا ہے۔ پاکستانی نجی ٹی وی چینل کے مطابق حکام قومی ادارہ صحت کا کہنا ہے  کہ انفلوئنزا اے کی سب ٹائپ ایچ 3 این 2 کے نتیجے میں پورے ملک میں لوگ بیمار ہو رہے ہیں۔

تفصیلات کے مطابق پاکستان میں کووڈ 19 کے کیسز کی شرح ایک فیصد سے بھی کم  رہ گئی ہے۔حکام کا کہنا ہے کہ  پاکستان بھر سے انفلوئنزا کے ہر ہفتے ہزاروں کیسز رپورٹ ہو رہے ہیں، بچوں میں نزلہ، زکام اور بخار آر ایس وی وائرس کی وجہ سے ہو رہا ہے،  بتایا جا رہا ہے کہ انفلوئنزا بوڑھے اور کمزور قوت مدافعت کے حامل افراد کے لیے خطرناک ہو سکتا ہے۔

اس بیماری سے تحفظ کے لیے قومی ادارہ صحت نے کچھ احتیاطی تدابیر بھی بتائی ہیں۔ ماہرین صحت کے مطابق  پاکستان میں اس وقت انفلوئنزا کی ویکسین دستیاب نہیں ہے، انفلوئنزا سے بچنے کے لیے ماسک استعمال کیا جائے اور ہاتھوں کو بار بار دھویا جائے،مزید یہ کہ انفلوئنزا ہونے کی صورت میں اینٹی بائیوٹک ادویات کا استعمال ہرگز نہ کریں۔